Нагласи и дека ако синдикатите и работодавачите се договорат за која било друга методологија и законско решение за утврдување на минималната плата, тука се да им помогнат и да им излезат во пресрет
Министерот за економија и труд Бесар Дурмиши ја потпишал, а потоа и ја објавил владината одлука за законско усогласување на минималната плата, со цел да не се предизвика блокада во исплатата на платите во државата. Ова го изјави одговарајќи на новинарско прашање зошто го сторил тоа со оглед дека нема согласност од Економско-социјалниот совет, како што налага законот.
„По одлука на Владата, јас како министер за економија и труд ја објавив минималната плата. Согласност од Економско-социјалниот совет нема поради тоа што нема репрезентативност од синдикатите. Но, според Законот што е во сила, и е потпишан и од синдикатите и од работодавачите, обврзан сум и по одлука на Влада, пред 31 март да ја објавам минималната плата. Од минималната плата потоа се пресметува и просечната и другите плати. Ако не ја објавевме до 31 март, ќе се блокираше целата држава и сите институции, а приватниот сектор не ќе можеше да пресмета плати за нивните вработени“,
рече Дурмиши.
На прашањето дека членовите на Сојузот на синдикати на Македонија денеска излегуваат на протест, посочи дека живееме во демократија и секој има право да излезе на улица и да го каже својот револт.
„Минималната плата според постоечкиот Закон или методологија за која се усогласени сите страни, изнесува 400 евра и е покачена нето платата за 1 800 денари“,
кажа тој.
На синдикатите веќе им е истечен мандатот и не се репрентативни, а за таа цел рече дека како Влада ја формирале комисијата која треба да ја утврди нивната репрезентативност.
„Таа комисија работи. Кога ќе се определи кој синдикат е репрезентативен, веднаш ќе ја свикам седницата на Економско-социјалниот совет. Токму таму синдикатите таму треба да ги кажат своите барања, а не на улица“,
додаде министерот.
Според него, како Влада се за социјален дијалог. Нагласи и дека ако синдикатите и работодавачите се договорат за која било друга основа или која било друга методологија и законско решение за утврдување на минималната плата, тука се да им помогнат и да им излезат во пресрет.
Со почеток во 12:05 часот, 300 члена од највисокото раководство на Сојузот на синдикатите на Македонија и синдикатите здружени во ССМ ја отворија јавната седница пред Работничкиот дом, која ќе продолжи пред Собранието, па пред Стопанската комора, а ќе се заврши пред Владата.