Да имаше правда и независно правосудство, денеска на обвинителната клупа за случајот „Рекет“ за завршни зборови ќе беше подготвен Зоран Заев. Но, бидејќи Заев ги уценува сите, а Вилма Русковска му е под целосна контрола, денеска завршни зборови во случајот „Рекет“ ќе има само за двајца извршители, кои исто така се уценети од Зоран Заев и мораат да молчат и да не ја кажат вистината, обвинуваат од ВМРО-ДПМНЕ.
На прес-конференција во партиското седиште, портпаролот Димче Арсовски судењето го оцени како фарса, со која, како што вели, треба да се спаси лидерот на СДСМ од кривична одговорност.
„Рекетот во висина од 1.5 милиони евра во ‘луј витон’ торба стана навика на оваа влада на СДСМ и Заев целиот овој мандат. Од самиот почеток случајот се води непрофесионално и аматерски. Најпрвин извршителите беа известени од Зоран Заев дека сите се знаат за рекетот, а потоа им беше допуштено одреден период да бришат, прикриваат докази и да губат телефони во кои има доказен материјал. Денеска гледаме дека Зоран Заев е заглавен до гуша во криминал, а граѓаните на големо ја зборуваат неговата улога во случајот ‘Рекет’. Сите знаат кои се извршителите, а кој е главниот организатор. Тоа е Зоран Заев. Но, тоа ќе го докаже независното правосудство и судство кое не е уценето од Зоран Заев“,
порача Арсовски.
Арсовски обвини дека власта сака што поскоро да се затвори случајот пред изборите.
„На Заев и СДСМ им се брза што побрзо да го завршат случајот ‘Рекет’ пред изборите, за да не се дознаат нарачателите на случајот ‘Рекет’. Заев е свесен дека само во вакво ‘трас-трас’ судство ќе може да се извлече од очигледниот случај фатен за рекетирање. ВМРО-ДПМНЕ е различна од СДСМ и затоа ќе победи на изборите. Со СДСМ и Заев добивме ‘Рекет’, хибриден режим, неспособност и сиромаштија. Му доаѓа крајот на Заев, доаѓа крајот на СДСМ, на нивниот криминал и на лагите“,
изјави Арсовски.