Четворица од пациентите се пренесени на лекување во Белгија, четворица во Холандија и четворица во Грција, јавува МИА
Вкупно 12 пациенти со изгореници од пожарот во Кочани во текот на ноќта се пренесени на лекување во три европски држави – Белгија, Холандија и Грција, јавува МИА.
Четворица од пациентите се пренесени на лекување во Белгија, четворица во Холандија и четворица во Грција.
Според информациите што ги пренесува дописникот на МИА од Брисел, четворицата повредени се префрлени во Белгија со специјален авион на вооружените сили на Романија, со кој истовремено на лекување во Холандија биле пренесени уште четири други лица повредени во пожарот.
„Четворицата настрадани ќе бидат сместени во три различни болници во Брисел, Антверпен и во Шарлероа. Благодарност до белгиската влада, особено нивното МНР, за сета досегашна помош, како и до Романија и Европската Унија, кои го организираа специјалниот лет од Скопје до Брисел“,
напиша македонскиот амбасадор во Белгија, Методија Белевски, во објава на социјалните мрежи.
Во текот на ноќта, со авион на грчкото воено воздухопловство од аеродромот во Скопје на лекување во Грција се префрлени уште четири пациенти. Грчкиот воен авион од Атина полетал за Скопје околу 22:30 часот, а транспортот завршил по 2 часот по полноќ. Повредените се хоспитализирани во две воени болници во Атина.
Заклучно со нив, бројот на повредени од пожарот кои се лекуваат во Грција се искачи на 12 – петмина од нив се хоспитализирани во Солун, а седум во Атина.