„На секој ученик што чувствува потреба или сака повеќе да разговара во врска со овие случувања, потребно е да се насочи кому и каде може се обрати, во и надвор од училиштето“, пишува во насоките објавени на веб-страницата на МОН
Насоки за постапување со учениците добиле училиштата и наставниците, а кои имаат за цел да им помогнат на училиштата како да им дадат психолошка поддршка на учениците по пожарот во објект во Кочани, во кој загинаа 59 лица.
„Овој настан ги погоди сите и затоа е важно да покажеме колективна солидарност и да изнајдеме начини како да ги поддржиме учениците да се справат со тагата и вознемиреноста што ги чувствуваат“,
велат од Министерството за образование и наука (МОН).
Во насоките за училиштата, што се објавени од МОН, а изготвени во соработка со УНИЦЕФ, Институтот за психологија при Филозофскиот факултет во Скопје и Комората на психолози, пишува дека треба да се одржуваат училишните активности и да не се откажуваат часовите зашто надвор од наставата учениците ќе се препуштат на неконтролирани влијанија од средината.
„Надвор од училиштето, тие може да бидат оставени сами без поддршка и под влијание на негативните вести што доаѓаат од медиумите“,
се вели во насоките.
Часовите, се наведува во насоките, треба да се организираат на начин на кој ќе се даде приоритет на психосоцијалната поддршка на учениците, а се препорачува наставниците да ги планираат активностите во консултација со стручните соработници.
„За време на часовите од важност за добросостојбата на учениците е да не се одржуваат тестови, да се организираат активности кои ќе им помогнат на учениците да се чувствуваат подобро. За време на часовите наставниците да одвојат време за разговор со учениците и да им овозможат да поразговараат за несреќата доколку чувствуваат потреба. На учениците треба да им се даде можност да ги искажат своите мисли и емоции во контролирана и поддржувачка средина. На секој ученик што чувствува потреба или сака повеќе да разговара во врска со овие случувања, потребно е да се насочи кому и каде може се обрати, во и надвор од училиштето“,
пишува во насоките.
Во насоките што се наменети за наставниците се даваат примери за обраќања и дискусија со учениците за време на часовите, а во насоките за родителите – совети како да разговараат за кризната состојба со своите деца, со што ќе им помогнат да се справат со последиците од трауматскиот настан.
„Ограничете го времето поминато со вести за настанот и внимавајте со информациите кои ги споделувате на социјалните мрежи. Постојаното изложување на медиумски содржини може да ги зголеми вашите и нивните грижи и стравови. Споделувањето информации може, исто така, да придонесе кон нејаснотии или ширење на непроверени податоци што може да направат штета. Придржувајте се до потврдени информации од релевантни извори“,
се додава во насоките.
Исто така, се препорачува да се работи на справувањето со вознемиреноста кај децата и се нагласува важноста од укажувањето дека станува збор несреќен случај, кој е изолиран и не треба да се генерализира во колективна и постојана опасност.
Насоките се достапни на веб-страницата на МОН и се подготвени на сите пет јазици на кои се изведува наставата во државава.