Господ нека им е напомош на СДСМ кога Атанаско Тунески им ја води енергетската политика, соопштиле од тогаш владејачката ВМРО-ДПМНЕ на 13 јануари 2015 година, како реакција на прес-конференцијата на универзитетскиот професор и тогашен социјалдемократ
Денеска, десет години подоцна, Атанаско Тунески заедно со Ирфан Шаќири е предлог за нов член на Регулаторната комисија за енергетика (РКЕ), соопштија од Владата за „360 степени“. Одлуката треба да ја донесе Собранието, откако претходно на предлог на Владата предвреме беа разрешени двајца членови на РКЕ бидејќи кога биле избрани, според власта, не ги исполнувале условите за тоа
Универзитетските професори д-р Атанаско Тунески и д-р Ирфан Шаќири се предлозите на Владата за нови членови на Регулаторната комисија за енергетика (РКЕ), велат од „Илинденска” бр. 2 за „360 степени“. Изборот е извршен по неодамнешниот оглас за именување двајца членови на Регулаторната комисија, на што му претходеше предвремено разрешување на два члена на РКЕ.
Од Владата велат дека пристигнале седум пријави.
„Имајќи ги во предвид професионалните искуства на кандидатите и списокот со образложение за пријавените кандидати од страна на Комисијата за разгледување на пријави, Владата достави предлог до Собранието за именување членови на Регулаторната комисија за енергетика и водни услуги и услуги на управување со комунален отпад на Република Северна Македонија и тоа: д-р Ирфан Шаќири и проф. д-р Атанаско Тунески кои се со богато академско и стручно искуство“,
велат од Владата за „360 степени“.
Кои се кандидатите
Атанаско Тунески е редовен професор на Машинскиот факултет во Скопје. Познат е во јавноста како експерт од областа на енергетиката, но не само како професор, туку и како политичар. Атанаско Тунески градеше политичка кариера прво во ВМРО-ДПМНЕ. Но, како што во 2012 г. соопштиле од партијата, бил „избркан и разрешен поради неспособноста и неуспешноста“.
Потоа, се префрла во СДСМ. Во 2018 г., по смената на власта, мнозинството го избира за член на Регулаторната комисија за енергетика. ВМРО-ДПМНЕ, како опозициска партија, обвинува дека се руши независноста на телото бидејќи власта става партиски кадри во РКЕ. Во 2020 година, Државната комисија за спречување на корупцијата утврди дека тој имал судир на интереси. Ем бил член на РКЕ, ем поседувал акции од компанијата „Макпетрол“, чие работење е предмет на регулација од РКЕ.
Мандатот му истече во 2023 година. На последните избори, во 2024 г., Тунески стана кандидат за пратеник на ЗНАМ.
Додека од Владата предводена од ВМРО-ДПМНЕ сега велат дека станува збор за кадар со „богато академско и стручно искуство“, медиумски текстови покажуваат како ВМРО-ДПМНЕ го оценувала Тунески пред околу десет години, кога беше член на СДСМ.
Тунески, стои во реакцијата, беше на власт и беше директор, а му се случи целосен колапс. По разрешувањето Атанаско Тунески прошета неколку партии, за да се скраси во СДСМ, бидејќи му прилегаат на неговата способност,
пренел Канал 5 на 13 јануари 2015 година.
Името на Ирфан Шаќири, пак, во јавноста е познато пред сѐ како на човек што го вршеше вештачењето за пожарот во модуларната болница во Тетово од областа на електротехниката. Според биографијата што ја објавил на социјалната мрежа „Линкдин“, освен што е вештак, тој има работно искуство од компанијата „Еколог“ и како вонреден професор на Тетовскиот и на Универзитетот на Југоисточна Европа.
Зошто нови членови
Дали Тунески и Шаќири ќе станат членови на Регулаторната комисија за енергетика, формално, зависи од Собрането. Постапката е таква што Владата ги предлага, а крајниот збор го има парламентот.
А токму парламентот ја одигра клучната улога за воопшто да има потреба од нови членови на РКЕ. На крајот на декември 2024 година, Собранието разреши два члена на РКЕ, на чие место сега веројатно ќе дојдат Тунески и Шаќири. Разрешувањето дојде по барање на Владата, која оцени дека тие не ги исполнувале условите за воопшто да бидат избрани во моментот кога биле избрани.
Таквиот развој предизвика полемики бидејќи Законот за енергетика не предвидува таква постапка за предвремено разрешување на член на Регулаторната комисија за енергетика. Последен, со критики, јавно истапи Артур Лорковски, директор на Енергетската заедница со седиште во Виена. Во македонскиот парламент побара објаснување од Владата за разрешувањата и индиректно изрази загриженост за можно мешање во незавиноста на регулаторното тело.
Во Собраниска процедура, патем, е предвременото разврешување на уште двајца актуелни членови на Регулаторната комисија за енергетика.