Од СДСМ велат дека ќе поднесат и иницијатива до Уставниот суд со која ќе бараат да се утврди прекршувањето на правото на пратениците на кои им било оневозможено согласно Деловникот да постават и да предложат измена и дополнување на дневниот ред
Од пратеничката група на Социјалдемократскиот сојуз на Македонија (СДСМ) најавија дека ќе поднесат кривична пријава против пратеничката Имрлијe Салиу-Фетаи од коалицијата „Вреди“.
Ваквата најава од СДСМ дојде по денешната седница на собраниска Комисија за социјална политика, млади и демографија со која претседаваше пратеничката Салиу-Фетаи, а која за оваа функција беше назначена од собранискиот спикер Африм Гаши.
Фетаи на почетокот на седницата побара од членовите на Комисијата да се изјаснат за дневниот ред, нагласувајќи дека таа според член 126 став 3 е назначена да претседава со оваа Комисија само по една точка од дневниот ред, односно за Предлог законот за изменување и дополнување на Законот за пензиското и инвалидското осигурување, по скратена постапка.
На ова реагираа пратениците на СДСМ кои побараа да им се даде можност за процедурална забелешка. Пратеничката на СДСМ Јованка Тренчевска побара процедурално за да го искаже предлогот за дополнување на дневниот ред, односно да биде ставен Законот за правата на бранителите.
Но, Салиу-Фетаи во тензична атмосфера побара од членовите на Комисијата да се изјаснат за дневниот ред и со осум гласа „за“ беше изгласан дневниот ред.
По ова пратеникот од СДСМ, кој е и координатор на пратеничката група, Оливер Спасовски, побара пауза.
Потоа на прес-конференција го најави поднесувањето кривична пријава за Салиу-Фетаи.
„Ние најавуваме дека ќе преземеме конкретни правни мерки, односно ќе поднесеме кривична пријва против претседавачот со Комисијата, Имрлије Фетаи-Салиу заради грубо кршење на Деловникот и грубо кршење на правата на пратениците. А, воедно ќе поднесеме и иницијатива до Уставниот суд со којашто ќе бараме да се утврди прекршувањето на правото на пратениците на коишто им беше оневозможено согласно Деловникот да постават и да предложат измена и дополнување на дневниот ред“,
рече Спасовски.
Тој нагласи дека од страна на претседавачот на Комисијата, Салиу-Фетаи бил прекршен Деловникот на Собранието, поточно членот 131, со тоа што, како што рече, не дозволила воопшто да се отвори расправа за предлог дневниот ред, ниту можност за негово изменување и дополнување со образложение дека претседателот на Собранието, Африм Гаши го утврдил дневниот ред и немало потреба да се утврдува друг од страна на членовите на Комисијата.
„Членот 131 од Деловникот говори дека дневниот ред на седницата на работното тело се утврдува на почетокот на седницата. Ставот 2 вели ’во дневниот ред може да се внесат и прашања што ги предложиле пратениците, претседателот на Собранието и Владата’. Ова покажува дека парламентарното мнозинство предводено од ’Вреди’ и ВМРО-ДПМНЕ сакаат целосно да го стават под контрола Законодавниот дом. Притоа правата на пратениците да ги загрозат, да не се остави можноста на опозицијата воопшто да даде било каков предлог и секое едно одржување на седницата да биде само по прашања што сака да ги постави парламентарното мнозинство“,
рече тој.
Според Спасовски, ова е невиден атак на демократијата и рушење на демократичноста и демократијата во Законодавниот дом, таму каде што, како што рече, демократијата треба да биде најразвиена, затоа што Собранието по правило е храм на демократијата.
За време на седницата, пратеникот од ВМРО-ДПМНЕ, Бојан Стојаноски, објаснувајќи ја процедурата, нагласи дека претседателот на Собранието ја задолжил пратеничката Салиу-Фетаи да ја води седницата на Комисијата со утврден дневен ред.
„Ако сака веќе некој да дава дополнување на дневен ред, тогаш оваа Комисија треба да добие претседател. Делегирајте некој што треба да биде претседател на оваа Комисија, ќе го гласаме сите 120 пратеници и потоа целосно да го имплементира Деловникот. Никој нема ништо спорно против нечие право да предлага точки на дневен ред“,
рече Стојаноски.
Пратеникот на „Влен“, Ријад Шаќири, обраќајќи им се на пратениците на СДСМ рече дека тие прават циркуз и дека Законот за бранители нема да може да помине доколку не биде регулиран со закон и статусот на поранешните припадници на ОНА.
Проблемот во Комисијата за социјална политика почна во ноември минатата година откако пратеничката од Алијансата за Албанците, Илире Даути, одби да го стави на дневен ред Предлог-законот за бранители доколку не се стави законско решение и за припадниците на ОНА.
Пратеничката група на „Левица“ поднесе интерпелацијата за Даути, а се најде на првата пленарна седница на законодавниот дом во новата година, ја поддржаа 61 пратеник. За интерпелацијата покрај пратеници на Левица гласаа и нивни колеги од владејачките ВМРО-ДПМНЕ и ЗНАМ.