Како и интерпелацијата на Дамева, се очекува денеска во парламентот да поминат и оние за другите четворица нејзини колеги. Сепак, и доколку бидат изгласани, интерпелациите не се обврзувачки, односно немаат правен ефект во смисла дека членовите на Советот да мораат да се повлечат од функциите
Со 77 гласа „за“ и ниту еден „против“ или „воздржан“, Собранието денеска попладне ја изгласа интерпелацијата на членката на Судскиот совет, Весна Дамева.
Гласањето недоверба за работата на Дамева го поддржаа пратениците од владејачкото мнозинство предводено од ВМРО-ДПМНЕ, кое заедно со партнери во „Вреди“ и ЗНАМ ја поднесе интерпелацијата.
По неа воопшто не се изјаснија нивните колеги од опозицискиот Социјалдемократски сојуз (СДСМ) и Демократската унија за интеграција (ДУИ) кои уште за време на расправата за интерпелацијата на Дамева ја напуштија пленарната сала.
Од друга страна, уште пред почетокот на седницата од опозициската Левица најавија дека гласаат за интерпелациите бидејќи, како што рече пратеникот Борислав Крмов, мора да се испрати порака до судството.
Инаку, интерпелацијата на Весна Дамева беше прва на дневен ред на денешната 40. пленарна седница на законодавниот дом.
Освен за Дамева, владејачкото мнозинство бара интерпелација и на нејзините колеги избрани од Собранието, Тања Чачарова-Илиевска, Муљазим Мустава, Павлина Црвенковска и Селим Адеми.
Имено, интереплациите се поделени во пет точки, односно за секој од петтемина членови на Судскиот совет пратениците ќе расправаат и ќе гласаат одделно.
Обраќајќи се од говорницата во пленарната сала на законодавниот Дамева, меѓу другото, кажа дека како што не одговарала на поединци од минатата власта, така не одговара и на поединци од оваа власт.
Во таа насока кажа дека не дозволила притисокот и омаловажувањата на кои била изложена од оваа иста говорница да влијаат на нејзината чест и совест, но оти не можела да помине преку болката што тоа ја предизвикало врз нејзиното семејство.
За интерпелација кажа дека е поднесена со потписите на 67 пратениците, кои не се потпишале на документот за чиј архитект го посочи пратеникот на ВМРО-ДПМНЕ, Антонијо Милошоски, кого го нарече политички моќник, туку на посебни листови.
Претходно, пратеникот на ВМРО-ДПМНЕ, Ѓорѓија Сајкоски, кажа дека интерпелациите на пет членови на Судскиот совет се клучен момент во борбата за владеење на правото и довербата во институциите.
„Ова е клучен момент во борбата за владеење на правото, за правдата и довербата во институциите и со овие поднесени интерпелации ние почитувани, не му судиме на судството. Со овие поднесени интерпелации ја детектираме одговорноста на оние коишто требало да бидат коректив, оние коишто требало да носат правда и коишто треба да воспостават она што требаше да биде судска власт“,
рече тој.
Сајкоски, аргументирајќи ја својата позиција, наведе неколку случаи, меѓу кои „Онкологија“, „Беса транс“, „Модуларната болница во Тетово“, за кои, како што кажа, сè уште нема правна разрешница.
„До каде е постапката за Крмзов која беше отворена и сега е застаната во судско-обвинителските лавиринти. Затоа треба денеска без разлика од која политичка провиниенција доаѓаме, без разлика на етничката припадност да работиме во насока да ги казниме оние коишто не направија ништо во судството, а беа автори на повеќе скандали од сите судии во државата“,
кажа Сајкоски.
Од друга страна, координаторот на пратеничката група на СДСМ, Оливер Спасовски интепрлациите ги оцени како груб удар на власта врз правосудниот систем и уште повеќе напад на владеењето на правото и напад на Уставот.
„И тоа не е ништо ново и не прв пат да се крши уставот и да се руши уставниот поредок кога станува збор за ова парламентарно мнозинство. Овде се повикуваме на реформи во правосудниот систем коишто се потребни за да се врати довербата на граѓаните,а реформата ја започнуваме преку операционализација на една неуставна интерпелација“,
рече Спасовски.
Додаде дека станува збор за опасен преседан кој ќе доведе до тешки последици подоцна.
Заклучувајќи го говорот, Спасовски рече дека пратеничката група на СДСМ нема да учествува во понатамошната расправа по интерпелациите на собраниската седница.
Ваквиот потег на пратениците на СДСМ наиде на критики од координаторот на пратеничката група на ВМРО-ДПМНЕ, Никола Мицковски, кој во таа насока порача дека аргументите се на нивна страна.
Пратеникот на ДУИ, Талат Џафери, пак, истакна дека со точките на дневен ред на денешната седница се прави двојна штета, прво врз Судскиот совет, а потоа за парламентарната демократија.
Како интерпелацијата на Дамева, се очекува во парламентот денеска да поминат и оние за останатите четворица нејзини колеги. Сепак, и доколку бидат изгласани, интерпелациите не се обврзувачки, односно немаат правен ефект во смисла дека членовите на Советот да мораат да се повлечат од функциите.
Ова пред извесно време го кажа и премиерот Христијан Мицкоски, најавувајќи го како, што го опиша „ударот во чело“ на судството. Тој тогаш рече дека иако интепрлациите немаа обврзувачко дејство, сепак очекува доколку бидат изгласани, петтемина членови на Судскиот совет да имаат доблест и самите да си поднесат оставки.