Оттаму нагласуваат дека е скандалозно што државата нема 10 милиони евра да инвестира во паркинг на Клинички центар, додека во исто време „власта се задолжува со 500 милиони евра за предизборен поткуп на локалните избори“
Министерот за здравство Арбен Таравари де факто го приватизира јавниот паркинг лобирајќи албанска компанија да стопанисува со паркингот на Клиничкиот центар во Скопје преку јавно-приватно партнерство во траење од 20 години. Со ова, Таравари стана епитет на политичка корупција, кој одработува за контроверзна фирма од странство, реагираат од Левица по информацијата што ја објави „Призма“ дека албанската компанија „Ѓока констракшн“ ќе стопанисува со паркингот на Клиничкиот центар.
„Со ваквиот енормно штетен договор со фирмата ‘Ѓока Констракшн’, целиот приход ќе оди за компанијата, додека за државата ќе остане само 1 отсто. Левица открива дека оваа компанија е поврзана со крупни скандали во Албанија, каде се спомнува и политичка корупција. Градежната компанија ‘Ѓока Констракшн’ била инволвирана во скандал поврзан со изградба на тунели, кои се урнале поради работа со неквалитетни материјали. Дополнително, оваа албанска компанија се спомнува и дека била дел од лобирање кај политичари од Албанија“,
се наведува во реакцијата на Левица.
Оттаму нагласуваат дека е скандалозно што државата нема 10 милиони евра да инвестира во паркинг на Клинички центар, додека во исто време „власта се задолжува со 500 милиони евра за предизборен поткуп на локалните избори“.
„Левица го предвиде ова сценарио и претходно поднесе амандман кон Буџетот за 2025 година со кој ќе се финансираше изградба на јавен паркинг, но, амандманот беше одбиен од ДПМНЕ, ‘Вреди’ и ЗНАМ – партии кои очигледно имаат за цел да го уништат јавното здравство и да ги наполнат џебовите на своите бизнис-партнери. Левица јавно го прашува министерот Таравари: колку провизија добил од контроверзната албанска компанија за пациентите да плаќаат повисоки цени за паркинг?!“,
се наведува во соопштението на партијата Левица.
Компанијата „Ѓока констракшн“ од Албанија преку јавно-приватно партнерство ќе стопанисува со паркингот на Клиничкиот центар „Мајка Тереза“. Ова за БИРН го потврдил министерот за здравство Арбен Таравари.
На огласот, кој беше распишан на 15 ноември, се јавила само „Ѓока констракшн“. Компанијата е формирана во Тирана во 1994 година, од 2022 има регистрирано подружница и во Скопје.
Таа ќе стопанисува со паркингот во следните 20 години, а како што објави „360 степени“, во огласот се превидува приватниот партнер да изгради две катни монтажни гаражи, да стопанисува со целиот паркинг на Клинички, а за возврат државата да добие еден отсто од вкупните остварени годишни приходи.