Украина контролира повеќе од 100 големи наоѓалишта на критични минерали, според истражувањето на Економскиот факултет во Киев, како и значителни резерви на нафта и природен гас
Украина и САД се договорија за општата рамка на поширокиот договор за минерални суровини, потврдија вчера американски и украински функционер, по неколкунеделен интензивен притисок и напади од американскиот претседател Доналд Трамп врз неговиот украински колега Володимир Зеленски. Конечните детали од договорот, вклучително и сумата што Украина ќе ја плати на САД, се уште не се објавени.
Сепак, нацртот што беше разгледан во вторникот повеќе не го вклучува барањето Украина да придонесе 500 милијарди долари во американскиот фонд.
Тој, исто така, не ја содржи клаузулата која бара отплата на двојно поголема сума од која било идна американска помош.
Според информациите на кои се повикува „Њујорк тајмс“, отстранувањето на некои од најтешките услови – што го предизвика гневот на Киев – овозможило продолжување на преговорите и го отворило патот за договор.
Како што е наведено во нацртот, Украина ќе придонесе во фондот половина од приходите од идната капитализација на нејзините природни ресурси, вклучително и критичните минерали, нафтата и природниот гас.
Според информациите што вчера ги објави „Фајненшел тајмс“, фондот ги исклучува приходите и активностите на најголемите производители на природен гас и нафта во Украина, „Нафтогас“ и „Укрнафта“.
Соединетите Американски Држави ќе го поседуваат максималниот (дозволен со американскиот закон) економски удел во фондот, кој ќе реинвестира дел од приходот во Украина.
Келог одигра клучна улога
Според украинските и американските претставници кои разговарале со порталот Аксиос, клучната улога во смирувањето на кризата и спречувањето на подлабок јаз меѓу Трамп и Зеленски ја одиграл американскиот пратеник, генералот Кит Келог.
„Средбите на генералот Келог со Зеленски во Киев минатата среда и четврток беа исклучително важни. Дипломатијата на трпение и упорност може да донесе резултати“, изјави американски функционер кој учествувал во разговорите.
Украинскиот претседател постојано притискаше за безбедносни гаранции за неговата земја во замена за правата за експлоатација на минерални суровини, бидејќи војната со Русија влегува во својата четврта година.
Сепак, нацртите на договорот во кои имал увид „Њујорк тајмс“ не содржеле такви безбедносни обврски на САД.
Според американски функционер, конечниот преведен нацрт на договорот бил испратен во Украина во вторникот.
Според истиот извор, договорот првично ќе го потпишат министрите за финансии на САД и Украина, по што Володимир Зеленски ќе отпатува во Вашингтон на финалните потписи со неговиот американски колега. Трамп во своите изјави рано утринава рече дека очекува Зеленски да биде во Белата куќа во петок.
Што е во игра
Украина контролира повеќе од 100 големи наоѓалишта на критични минерали, според истражувањето на Економскиот факултет во Киев, како и значителни резерви на нафта и природен гас.
Титаниумот, меѓу другото, се користи во градежната индустрија, аеронаутика, ортопедски импланти, но и како додаток на бои и козметика, вклучително и креми за сончање. Рудниците за титаниум во централна Украина сочинуваат приближно шест отсто од глобалното производство, наведуваат украинските медиуми.
Литиумот е клучен елемент во батериите – вклучувајќи ги и батериите за електрични автомобили – и во другите индустриски производи. Украина има една третина од вкупните резерви во Европа, иако некои локации се во воени зони. Пред војната со Русија, украинските власти му предложија на Елон Маск да инвестира во украинските рудници за литиум.
Ураниумот се користи во нуклеарни централи и нуклеарно оружје, а Украина има најголеми резерви на ураниум во Европа.
Има и ретки метали, група од 17 тешки метали кои се широко распространети во Земјината кора низ целиот свет и се користат во многу високотехнолошки полиња, како што се зелената енергија, електрониката и воздушната индустрија. Украина има значителни резерви, кои главно се неискористени.
Овој договор потенцијално ќе отвори нови можности за економскиот развој на Украина, истовремено обезбедувајќи им на САД пристап до виталните минерали кои се од суштинско значење за модерната технологија и индустрија.