ЕУ и САД не смеат да бидат поделени во мировните преговори за Украина, рече Шолц по состанокот во Париз

Средбата на европските лидери доаѓа во време кога администрацијата на Трамп остро ја критикува Европската унија и планира директно да преговара со Русија за ставање крај на војната во Украина

Германскиот канцелар Олаф Шолц по состанокот на европските лидери во Париз повика на единство меѓу Европа и Соединетите Американски Држави по прашањето за одговорноста на безбедноста на Украина, пренесува Ројтерс. Оваа негова изјава следи откако САД се обидоа да започнат преговори со Русија без консултација со Европската Унија.

„НАТО се заснова на тоа секогаш да дејствуваме заедно и да ги споделуваме ризиците. Со тоа ја обезбедуваме нашата безбедност. Ова не смее да се доведува во прашање“,

рече тој.

Лидерите на неколку европски земји денеска се собраа во Елисејската палата во Париз на итен самит свикан од францускиот претседател Емануел Макрон за да се договорат за заеднички став за Украина пред администрацијата на американскиот претседател Доналд Трамп да преземе дополнителни чекори.

Макрон ги пречека европските лидери на самитот во Париз

Средбата на европските лидери доаѓа во време кога администрацијата на Трамп остро ја критикува Европската унија и планира директно да преговара со Русија за ставање крај на војната во Украина. На неа присуствуваа и лидерите на Италија, Полска, Шпанија, Холандија и Данска, како и претседателката на Европската комисија и генералниот секретар на НАТО Марк Руте.

Лидерите на ЕУ на итен состанок во Париз, ќе разговараат за плановите на Трамп да стави крај на војната во Украина

Трамп неодамна телефонски разговараше со рускиот претседател Владимир Путин, при што беше спомената можноста за преговори за Украина, што предизвика загриженост кај европските лидери.

На Минхенската безбедносна конференција, американскиот потпретседател Џеј Ди Венс ја критикуваше ЕУ, обвинувајќи ја за непочитување на слободата на говорот. Тој потврди дека САД размислуваат за преговори за Украина без учество на Европејците.

Украинскиот претседател Зеленски ги повика сојузниците да останат цврсти и да спречат договор што ќе биде направен зад грбот на Украина и Европа.

Францускиот министер за надворешни работи Жан-Ноел Баро изјави дека Европа, вака или онака, ќе биде дел од преговорите за Украина.