Според него, ако се разговара за промена на државниот грб или на државните обележја, ќе се отвори една голема дискусија, односно една голема тема
Државниот грб ги задоволува сите потреби и од историски континуитет и од географски континуитет и ја отсликува реалноста на македонскиот народ и македонската држава. Ова денеска го изјави лидерот на Движењето ЗНАМ – За наша Македонија, Максим Димитриевски, коментирајќи ја темата за промена на државниот грб откако минатата недела премиерот Христијан Мицкоски потврди дека партиите од владејачката коалиција ВМРО-ДПМНЕ и „Вреди“ го отвориле ова прашање.
Димитриевски смета дека ако се разговара за промена на државниот грб или на државните обележја, ќе се отвори една голема дискусија, односно една голема тема.
„Сите симболи нам ни значат, вклучувајќи го и лавот и сонцето од Кутлеш, кое, за жал, согласно Преспанскиот договор, веќе не е составен од таа иконографија. Истото важи и за петокраката. Ќе отвориме дискусија, па ќе видиме. Не сакам да отфрлам ништо од самиот почеток“,
рече тој денеска во Скопје, каде што присуствуваше на четвртата јавна дебата за измени на Законот за локална самоуправа.
Според него, ЗНАМ сметаат дека не треба да се дозволи од државните обележја да имаме дополнително наметнување на политиката и партизација.
Пратеникот на ВМРО-ДПМНЕ, Антонијо Милошоски, смета дека Македонија треба да има современ државен грб и со неговата симболика да биде дел од европското друштво на држави, а не во друштво на Белорусија, Таџикистан и Ангола.
Премиерот Христијан Мицкоски неодамна потврди дека партиите од владејачката коалиција ВМРО-ДПМНЕ и „Вреди“ го отвориле прашањето за промена на државниот грб.
За потсетување, идејата за промена на државниот грб потекнува од 2014 година, кога владата на ВМРО-ДПМНЕ предводена од Никола Груевски излезе со таков предлог.
Станува збор за црвен лав на златно-жолта заднина во форма на штит, како и круна во горниот дел во форма на тврдина.
Тогаш ДУИ се согласи на ваков државен грб, нагласувајќи дека лавот е дел и од албанската традиција, а го има и во грбот на градот Тирана. Круната, пак, рекоа, го претставува Скопското кале.