Како што посочи тој, побарани се две измени во правилникот, односно да се овозможи преместување на лекови од болничката на аптекарската позитивна листа, како и Фондот да добие право за преговарање на цените на лековите кои се субвенционирани
Наместо да се бара рефундација, лекот против згрутчување на крвта „клексан“ ќе може да се подигне на рецепт во аптеките, најави директорот на Фондот за здравствено осигурување (ФЗО) Сашо Клековски на денешната заедничка прес-конференција со директорот на Управата за извршување санкции Александар Пандов.
Како што посочи тој, побарани се две измени во правилникот, односно да се овозможи преместување на лекови од болничката на аптекарската позитивна листа, како и Фондот да добие право за преговарање на цените на лековите кои се субвенционирани.
„Позитивната листа претставува форма на субвенција за одредени лекови. Сметаме дека кога државата веќе ги субвенционира, треба да имаме право да преговараме за нивната цена, а не да ја прифаќаме автоматски големопродажната цена. Забележавме дека со претходното зголемување на позитивната листа сите производители ги користеа максималните дозволени цени“,
рече Клековски.
Тој додаде дека лековите што се на позитивната листа треба да бидат достапни по пониска цена, со цел субвенциите да имаат реален ефект.
„Прв приоритет ни е префрлањето на антикоагулансите, особено ‘клексан’, кој веќе е на болничката листа. Наместо пациентите да чекаат рефундација, ќе можат директно да го подигнат на рецепт. Очекуваме штом Комисијата почне со работа и правилниците бидат усогласени, оваа промена да стане реалност“,
рече Клековски.
Според него, производителите не сакаат да го вклучат таблетарниот антикоагуланс „ксалерто“ на позитивната листа, нагласувајќи дека Фондот разговара со еден од производителите за да обезбеди пониска цена.
„Разговараме со еден од производителите за да обезбедиме пониска цена бидејќи овој лек е често користен кај повозрасните пациенти со кардиолошки проблеми“,
додаде директорот на ФЗО.