Високата претставничка изрази очекување дека Советот на ЕУ постепено ќе ги ублажи санкциите против Сирија и изрази подготвеност да ја обнови работата на Делегацијата на ЕУ во Дамаск
Високата претставничка на Европската Унија за надворешна политика и безбедност Каја Калас изрази очекување дека европските министри за надворешни работи денеска ќе одобрат продолжување на санкциите против Русија поради војната во Украина, како и олеснување на мерките наметнати на Сирија под владеењето на поранешниот претседател Башар ал Асад.
„Очекувам денеска да биде одобрено продолжувањето на санкциите против Русија. Треба да разговараме каков дополнителен притисок можеме да извршиме за да се стави крај на војната во Украина“,
изјави Калас пред почетокот на првиот состанок на Советот за надворешни работи на ЕУ годинава во Брисел.
Калас соопшти дека синоќа министрите за надворешни работи разговарале со лидерката на опозицијата во Белорусија, Светлана Тихановскаја.
„Го поддржуваме белорускиот народ“,
рече Калас.
Според неа, министрите за надворешни работи денеска ќе разговараат за хибридни закани, вклучително и настани во Балтичкото Море и на други места во Европа.
Високата претставничка изрази очекување дека Советот на ЕУ постепено ќе ги ублажи санкциите против Сирија и изрази подготвеност да ја обнови работата на делегацијата на ЕУ во Дамаск.
Калас најави дека ЕУ е подготвена да го врати своето присуство на граничниот премин Рафа меѓу Египет и Газа за да ја олесни испораката на хуманитарна помош за Палестинците.
„Треба да го приспособиме нашиот начин на работа на новата администрација во САД. Очекувам многу добра соработка“,
рече европската дипломатка одговарајќи на новинарско прашање.