Новиот американски државен секретар Марко Рубио испратил порака за замрзнувањето на развојната помош до американските амбасади низ светот, во која ја појаснил имплементацијата на извршната наредба што американскиот претседател Доналд Трамп ја потпиша на 20 јануари
Американскиот Стејт департмент вчера одлучил да го замрзне издвојувањето средства за речиси целата помош на Соединетите Американски Држави (САД) во странство. Исклучок, како што пренесе Асошиејтед прес (АП), ќе бидат само хуманитарните програми за испраќање храна и воена помош во Израел и Египет.
Со наредбата, како што наведуваат дел од медиумите, се запираат многубројни проекти кои обезбедуваа глобална помош во здравството, образованието, развојот, судството, обуки за работа и други области.
Имено, извршната наредба се однесува на 90-дневна пауза во обезбедувањето на американската развојна помош во странство, со цел да се оцени, како што се наведува, нејзината ефикасност и конзистентност со надворешната политика на САД.
Новиот американски државен секретар Марко Рубио испратил порака за замрзнувањето на развојната помош до американските амбасади низ светот, во која ја појаснил имплементацијата на извршната наредба што американскиот претседател Доналд Трамп ја потпиша на 20 јануари, а во која се наведува дека понатамошната американска помош во странство нема да се исплаќа на начин што не е целосно усогласен со надворешната политика на САД.
Инаку, САД обезбедуваат повеќе помош на глобално ниво од која било друга земја. Во 2023 година за оваа намена беа испланирани 60 милијарди долари, што е околу еден процент од буџетот на САД, пишува регионалниот сервис на Радио Слободна Европа (РСЕ).
Наредбата испратена преку телеграма до американските амбасади забранува натамошно трошење на владата за постојните програми, што значи дека тие можат да се спроведат само со готовина што е веќе достапна.
Додека трае периодот од 90 дена, во кој ќе биде суспендирана помошта, Стејт департментот ќе прегледа илјадници американски програми за помош и ќе одлучи кои од нив може да продолжат.
Хуманитарните групи, невладините организации, претприемачите, земјоделците и владите ширум светот со загриженост ги следат новите планови на Вашингтон.
Агенцијата АФП објави дека суспендирањето на финансирањето потенцијално може да влијае на Украина, која доби милијарди долари во оружје за време на претходникот на Трамп, Џо Бајден.
Според шефицата на „Оксфам Америка“, Аби Максман, суспендирањето на финансирањето може да има последици кои значат живот или смрт за децата и семејствата низ светот кои зависат од неа.
„Со суспендирање на помошта за развој во странство, администрацијата на претседателот Трамп ги загрозува животите и иднината на заедниците во криза и го напушта долгогодишниот двопартиски пристап кон странската помош на САД што ги поддржува луѓето врз основа на потреба, без оглед на политиката“,
рекла Максман во изјавата за агенцијата Асошиејтед прес.
Суспендирањето на средствата за развојна помош во странство беше едно од ветувањата на новиот американски претседател Доналд Трамп, како и други претставници од републиканскиот табор, кои бараа засилена контрола врз програмите за помош на САД.
Републиканецот од Флорида, Брајан Маст, кој е новиот претседател на Комитетот за надворешни работи на Претставничкиот дом, оваа недела изјави дека дека републиканците внимателно ќе го испитаат секој долар и секој дипломат во буџетот на Стејт департментот за да се осигурат дека ги исполнува нивните стандарди.