Израелската војска соопшти дека болницата била користена како команден центар за воените операции на Хамас и дека уапсените се осомничени милитанти. Абу Сафија бил приведен на сослушување бидејќи е осомничен дека е оперативец на Хамас, додаваат воени извори
Израелските сили уапсиле повеќе од 240 Палестинци, вклучително и десетици членови на медицински персонал, како и директорот на болницата во северниот дел на Појасот Газа во која извршија рација вчера, според министерството за здравство на енклавата и израелската војска.
Министерството за здравство на Газа соопшти дека е загрижено за Хусам Абу Сафија, директорот на болницата „Камал Адван“, бидејќи дел од членовите персоналот што израелската армија ги ослободи доцна во петокот сведочеа дека војниците го претепале.
Израелската војска соопшти дека болницата била користена како команден центар за воените операции на Хамас и дека уапсените се осомничени милитанти. Абу Сафија бил приведен на сослушување бидејќи е осомничен дека е оперативец на Хамас, додаваат воени извори.
Хамас вчера го отфрли како лага израелското тврдење дека за време на 15-месечната војна во Газа, нивните борци оперирале од болница. Групата се уште не ги коментирала 240-те апсења.
Рацијата спроведена во болницата, една од трите медицински установи на северниот раб на Појасот Газа, ја стави надвор од работа последната голема здравствена установа во северна Газа, објави Светската здравствена организација (СЗО) на социјалната мрежа Икс.
„СЗО е згрозена од вчерашната рација. Систематското распаѓање на здравствениот систем и опсадата на северниот дел на Појасот Газа, која трае повеќе од 80 дена, ги става во опасност животите на 75 000 Палестинци кои остануваат во областа“,
соопшти СЗО.
Пациентите се евакуирани во болница која не е во функција
Некои пациенти беа евакуирани од болницата „Камал Адван“ во индонезиската болница во Џабалија која не е во функција. Медицинскиот персонал беше спречен да им се придружи таму, соопшти министерството за здравство во Газа. Другите пациенти и персоналот беа пренесени во други медицински установи.
Израелската армија соопшти дека пред оваа операција биле евакуирани 350 пациенти и членови на медицинскиот персонал, додека за време на операцијата, во координација со локалните здравствени власти, уште 95 биле евакуирани во индонезиска болница, чија изградба и персонал ги обезбедила Р. Индонезија.
Министерството за здравство на Газа објави дека 18 Палестинци биле убиени во израелските напади врз енклавата во саботата, од кои најмалку девет во куќа во кампот Магази во централниот дел на Појасот Газа.
Израелската армија не ги коментираше нападите или жртвите.