Билатералните односи не се дел од преговарачката рамка, но сакам да кажам и дека добрососедските односи се дел од еден преговарачки процес. Северна Македонија и Бугарија се соседни, пријателски држави кои споделуваат заедничка историја и верувам и заедничка иднина во Европската Унија, вели известувачот за нашата земја во Европскиот парламент, европратеникот Илхан Ќучук во интервју за МИА.
Тој признава дека последните месеци се искажани тешки зборови, и иако тие во политиката имаат продолжено дејство, како што вели, не треба да се избрише сѐ што е досега постигнато. Смета дека историската комисија треба да продолжи да работи и да има широк мандат и дека е грешка што во последните неколку месеци таа не заседаваше, за да им се даде можност на историчарите да ги решат историските прашања, а политичарите да гледаат кон иднината.
„Ставот на ЕУ институциите е да се почитуваат договорите за добрососедство, да се исполнуваат и заедно да градиме иднина. Не гледам причина Бугарија и Северна Македонија да бидат непријатели, гледам логика да бидат најдобри и најблиски пријатели во ЕУ, како Германија и Австрија на пример. Спротивното би било историска грешка. Мојата задача како известувач е двете страни да се зближат максимално. Северна Македонија да се приближи максимално до ЕУ и да стане членка. Втора работа што е многу важна е да не се искажуваат тешки зборови, ниту пред избори, ниту после, ниту за време на изборите. Затоа што тие имаат своја тежина“,
вели Ќучук во интервју за МИА.