Прашана дали по усвојувањето на уставните измени би можело да се дадат гаранции дека земјава повеќе нема да има блокади на патот кон ЕУ, Кос рече дека таа не е онаа која може да даде одговор на тоа прашање
Веднаш по одобрувањето на новиот состав на Европската комисија, новата еврокомесарка за проширување Марта Кос во изјава за медиумите го повтори својот став за С Македонија, велејќи дека од земјава очекува промена на Уставот за вклучување на Бугарите – ништо повеќе и ништо помалку, јави специјалниот известувач на МИА од Стразбур. Тоа, како што вели Кос, е нешто на кое смета ЕК.
„Верувам дека тоа е можно, и после тоа навистина да го забрзаме процесот“,
изјави еврокомесарката за проширување.
Прашана дали по усвојувањето на уставните измени би можело да се дадат гаранции дека земјава повеќе нема да има блокади на патот кон ЕУ, Кос рече дека таа не е онаа којашто може да даде одговор на тоа прашање.
Во однос на тоа како може да се реши спорот со Бугарија, еврокомесарката вели дека треба да се разговара што е можно повеќе и со Скопје и со Софија.
„Мора да покажеме дека тоа е во наши раце, како да го решиме овој билатерален проблем. Без ова, а следејќи ги европските вредности, нема да можеме да го направиме она што е најдобро за ЕУ, и секако, за С Македонија“,
изјави Кос.
Проширувањето денес, оцени новата еврокомесарка за проширување, е различно од пред пет години – сменета е геополитичката ситуација, динамиката на проширувањето. Според неа, реални се шансите во следните неколку години до крај на евроинтегративниот процес и влез во ЕУ да се доведат неколку држави. Тие, како што рече, ќе бидат државите кои ќе ги исполнат сите услови.
„Моето назначување мислам дека е позитивно за Западен Балкан. Ќе имам блиска и тесна соработка колку што е можно повеќе со државите кои се подготвени да влезат во ЕУ. Да ги посетам сите, навистина да работиме за нивен влез во ЕУ“,
истакна Кос.