Костадинов му врати на Герасимовски: Поважна е поддршката во одлуките, а не дестабилизација во нашите редови

„Во ова време на предизвици на СДСМ, од клучно значење е одржувањето на единството и колегијалноста. Недостаток на сериозен политички однос и реално поимање на ситуацијата може да доведе до нова дестабилизација во нашите редови“, напиша струмичкиот градоначалник коментирајќи ја изјавата на колегата од Општина Центар

Не се работи за избрзана одлука, туку за решителност да ги заштитам интересите на моите сограѓани. Се надевам дека и ти со истата посветеност ќе ги штитиш интересите на граѓаните на Општина Центар. Ова денеска му го порача градоначалникот на Струмица, Костадин Костадинов, на својот колега, градоначалникот на Центар, Горан Герасимовски, во врска со одлуката за напуштање на Заедницата на единиците на локалната самоуправа (ЗЕЛС), која Герасимовски ја оцени за избрзана, и посочи дека градоначалните на опозицијата треба да се координираат.

„Во ова време на предизвици на СДСМ, од клучно значење е одржувањето на единството и колегијалноста. Недостаток на сериозен политички однос и реално поимање на ситуацијата може да доведе до нова дестабилизација во нашите редови“,

напиша Костадинов на својот фејсбук-профил.

Во овој момент, посочи оти е поважно да се размислува за поддршка на одлуките, отколку да се констатира или да се толкува.

„Политички став или партиска кариера се градат исклучиво на постулатот на единството. Така било, така е и ќе биде. Само силни и сплотени можеме да биеме битки“,

вели градоначалникот на Струмица.

Градоначланикот на Општина Центар, Горан Герасимовски, денеска во гостување на радиоемисија рече дека е евидентно оти Општина Струмица изминатиот период се соочува со одредени притисоци и можни политички влијанија, но ја оцени за избрзана одлуката на градоначалникот Костадинов за напуштање на ЗЕЛС.

Го разбирам револтот на Костадинов, но одлуката за напуштање на ЗЕЛС е избрзана, вели Герасимовски

Смета дека е потребна координација на сите градоналници од опозицијата, на која ќе заземат позиции како да дејствуваат во иднина.

Општина Струмица и официјално се откажува од членството во ЗЕЛС – Костадинов ќе поднесе оставка од функцијата во Управниот одбор

Струмичкиот градоначалник пред два дена соопшти дека Општина Струмица ќе ја напушти ЗЕЛС, како и дека одлуката е донесена во знак на револт поради индиферентниот однос во периодот кога струмичани се соочуваат со забрана за водата за пиење, како и по одбивањето од Владата за реализација на единствениот пријавен проект од оваа општина со средства од унгарскиот кредит.