Оттаму нагласуваат дека Христовски, во својата биографија објавена од Факултетот за безбедност, приложил уверение за познавање англиски јазик и положен тест ТОЕФЛ од училиште во Пловдив – Бугарија, но на официјалните страници на ТОЕФЛ јасно стои дека нема ТОЕФЛ-центар за тестирање во Бугарија
Назначувањето на Бојан Христовски на чело на Агенцијата за национална безбедност (АНБ), освен што е опасна партизација, отвора и низа сомнежи за тоа дали Христовски воопшто ги исполнува законските услови да биде на ваква висока позиција, соопштија денеска од опозицискиот СДСМ.
„Иако Христовски пријавил во биографијата пет календарски години раководен стаж недостасуваат прецизни датуми за неговото раководно искуство во УБК во периодот од 2012 до 2017 година. Законските услови за оваа позиција во делот на образованието се исполнети дури минатата година, со дипломирање на Економскиот факултет на Универзитетот за туризам и бизнис во Скопје. Но, претходно тој бил дипломиран тренер по кик-бокс со што не ги задоволувал законските критериуми предвидени за оваа важна функција“,
посочуваат од СДСМ.
Оттаму нагласуваат дека Христовски во својата биографија објавена од Факултетот за безбедност приложил уверение за познавање англиски јазик и положен тест ТОЕФЛ од училиште во Пловдив, Бугарија.
„Но, на официјалните страници на ТОЕФЛ јасно стои дека нема ТОЕФЛ-центар за тестирање во Бугарија. Дури и оние што не работат се наведени на оваа интернет страница (https://www.toefl.givemesomeenglish.com/bulgaria-toefl-testing-dates-and-locations/). ТОЕФЛ-центри за тестирање во Бугарија има во шест града, но не и во Пловдив“,
реагираат од СДСМ.
Од најголемата опозициска партија прашуваат дали Христовски има вистински документ за соодветно познавање на англискиот јазик и дали има пет години стаж на раководни позиции, односно, дали воопшто ги исполнува законските услови.
„Планот на ВМРО-ДПМНЕ по секоја цена да поставува партиски кадри, да ги партизира и злоупотребува институциите значи целосно уништување на безбедносните структури. СДСМ бара итно повлекување на Трајковски и отворање нова транспарентна постапка за избор на нов директор на АНБ со почитување на сите прописи и законски норми“,
порачаа од СДСМ.