Машал сега е одговорен за сета комуникација со клучните страни вклучени во преговорите и прашањата за затворениците, пренесува либанската телевизија
Еден од лидерите на Хамас, Калед Машал, е назначен за вршител на должноста лидер на ова милитантно движење по ликвидацијата на Јахја Синвар, јавува либанската телевизија ЛБЦИ повикувајќи се на свои извори.
Машал сега е одговорен за сета комуникација со клучните страни вклучени во преговорите и прашањата за затворениците, пренесува либанската телевизија.
Извори на ЛБЦИ потврдиле дека раководството на Хамас ги информирало турските, катарските и египетските власти за смртта на Синвар за време на операцијата во Тел ал Султан.
Покрај тоа, тие навеле дека за убиството на Синвар и неговото влијание врз преговорите и потенцијалниот прекин на огнот разговарале американскиот државен секретар Ентони Блинкен и катарскиот премиер и министер за надворешни работи шеикот Мохамед бин Абдулрахман ал Тани.
Хамас најави дека по убиството на Синвар преговорите за размена на заробеници и завршување на војната ќе стануваат сè потешки и посложени.
Израелските одбранбени сили (ИДФ) вчера официјално соопштија дека Синвар, за кој се верува дека е организаторот на нападот врз Израел на 7 октомври 2023 година, бил убиен од израелската армија во Појасот Газа.
„Јахја Синвар е елиминиран по една година помината криејќи се меѓу цивилното население на Газа, но и во засолништата во тунелите на Хамас“,
соопшти израелската војска.