Од ОЈО велат дека се издадени наредби за вештачење на траги пронајдени на местото на несреќата, а исто така вештачење ќе се врши и на комбето кое било подигнато од местото на несреќата
Основното јавно обвинителство (ОЈО) Скопје издало наредба за обдукција на тројцата загинати во вчерашната сообраќајна несреќа на автопатот Скопје – Велес.
Од Обвинителството информираат дека се преземаат дејствија за утврдување на причините за сообраќајката. Во текот на ноќта ОЈО издало наредба и за вештачење на траги пронајдени на местото на несреќата.
„Комбето е подигнато од местото на несреќата и ќе се врши и вештачење со цел да се испитаат сите околности кои довеле до настанот“,
велат од ОЈО.
Синоќа од ОЈО информираа дека дежурен јавен обвинител од Основното јавно обвинителство Скопје заедно со екипи на МВР вршеле увид на местото, на кое бил повикан и сообраќаен вештак за утврдување на причините за несреќата.
Од Обвинителството информираа дека се преземаат сите увидни дејствија и оти јавниот обвинител ги издал сите потребни наредби за вештачења.
Несреќата била пријавена во 17:45 часот кога на автопатот пред тунелот кај Катланово се превртело комбе.
Во несреќата беа повредени пет лица, кои, како што информираа од Министерството за внатрешни работи, се пренесени во болница.