Во Скопје 47 отсто од жителите се задоволни од јавниот превоз. Понезадволни од скопјани се граѓаните на Рим, Тирана, Подгорица, Белград и Никозија
Скопје е речиси на дното на листата од 35 европски метрополи чии граѓани се изјасниле за најнезадоволни од услугите на јавниот превоз, пишува Еуроњуз во анализата „Јавен превоз: Кој е најдобриот и најлошиот град во Европа“.
Истражувањето на Еуроњуз покажува дека постои голем јаз во нивоата на задоволство од јавниот превоз во европските градови. Така, граѓаните што живеат во градовите од северна и западна Европа пријавија поголемо задоволство од јавниот превоз, додека оние од урбаните центри во јужна и источна Европа покажаа пониски стапки на задоволство.
„Јавниот транспорт има големо влијание врз целокупното задоволство на граѓаните во градот во кој живеат. Според извештајот на Европската комисија, седум до 10 жители во Европа се генерално задоволни од јавниот превоз во нивниот град“,
пишува Еуроњуз.
Во Скопје 47 отсто од жителите се задоволни од јавниот превоз. Понезадволни од скопјани се граѓаните на Рим, Тирана, Подгорица, Белград и Никозија.
Сепак, мора да се забележи дека во Скопје, освен автобуски јавен превез, нема други опции за траспорт.
Public transport: What is the best and worst city in Europe?
— euronews (@euronews) October 11, 2024
Looking at the capitals, northern and western European cities reported higher satisfaction with public transport, while southern and eastern European urban centres exhibited lower satisfaction rates. #EuropeinMotion pic.twitter.com/e52PURxXNj
Според анализата на Еуроњуз, најголемо задоволство од јавниот превоз имаат граѓаните на Виена со 91 отсто. Потоа, следуваат граѓаните на Хелсинки со 89 отсто и тие на Осло со 88 отсто.
Најмалку задоволни од јавниот превоз се граѓаните на Рим и Тирана со 29 отсто. Задоволството на граѓаните на Подгорица е 37 отсто, додека во Белград се со 44 отсто.
Во анализата на Еуроњуз се забележува дека европските метрополи доживуваат брза трансформација на јавниот превоз.
На ранг-листата за перцепција за безбедноста на јавниот транспорт во европските метрополи Скопје исто така е речиси на дното, односно 62 отсто од жителите сметаат дека јавниот превоз е безбеден.
Рим повторно е на последното место, а помалку од половина од тамошното население смета дека јавниот превоз е безбеден.
Жителите на Прага дале највисоки оцени за безбедност на јавниот превоз со 93 отсто.
Фактори што влијаат во оценката за задоволството на граѓаните се достапноста, брзината, безбедноста и довербата во јавниот превоз.
Инаку, Европската комисија има за цел да поттикне промени во користењето на јавниот транспорт, односно тој да се направи поатрактивен и поефикасен.