Освен за прашањето за бугарската самосвест, Кузеска рече дека министерката Божиновска должи одговори и за долгот на фирмите од еден милион евра
Како се чувствува Божиновска и дали има бугарска самосвест не е прашање за адвокати, вели портпаролката на СДСМ, Богданка Кузеска, откако пред два дена министерката за енергетика Сања Божиновска рече дека ќе се консултира со адвокат околу неколкуте прашања за нејзиното бугарско државјанство.
„Како се чувствува Божиновска и дали има бугарска самосвест не е прашање за адвокати, недозволиво е да ја лаже и да ја манипулира јавноста, таа извршува висока јавна функција и поради односите со Бугарија има должност да ѝ соопшти на јавноста за нејзината самосвест“,
рече Кузеска на денешната прес-конференција.
Освен за прашањето за бугарската самосвест, Кузеска рече дека министерката Божиновска должи одговори и за долгот на фирмите од еден милион евра.
На прашањето на „360 степени“ дали може на увид на јавноста да ѝ стави документ од бугарските власти со кој ќе потврди дека веќе не е бугарска државјанка, во петокот министерката за енергетика од редовите на ВМРО-ДПМНЕ одговори дека за тоа ќе мора да се консултира со адвокатите.
Божиновска на прашањето дали сè уште поседува бугарско државјанство одговори оти има македонско и чешко државјанство и македонски и чешки пасош.
„360 степени“ во јуни годинава објави дека Божиновска поседува бугарско државјанство и дека со бугарски пасош ја раководела компанијата „Руднап“ во Хрватска. А, за да се добие бугарско државјанство, барателот треба да се декларира дека се чувствува како Бугарин пред тамошните власти и да ги наведе своите бугарски корени.
На прашањето на „360 степени“ дали поседувала или дали во моментот поседува бугарско државјанство и зошто не го декларирала во биографијата приложена кон предлогот за состав на новата влада, Божиновска во јуни ни одговори:
„Што се однесува до вашите конкретни прашања, во мојата официјална биографија е јасно наведено дека сум македонска државјанка и дека поседувам и чешко државјанство. Во врска со тврдењата за бугарско државјанство, сакам да нагласам дека не поседувам бугарско државјанство и сите релевантни информации се транспарентно наведени во мојата биографија“.