Градоначалникот и петтемина вработени овозможиле фирма да стекне противправна имотна корист во износ од 147 341 700 денари
Одделот за криминалистичка полиција – Сектор за економски криминал и корупција во координација со Одделот за сузбивање организиран и сериозен криминал до Основното јавно обвинителство Скопје поднесе кривична пријава против градоначалник на една скопска општина, пет лица вработени во Секторот за урбанизам во општината и правно лице од Скопје поради постоење основи на сомнение за сторено кривично дело злоупотреба на службената положба и овластувањето, информираат од МВР.
„По поднесеното барање за утврдување правен статус на бесправен објект од страна на пријавеното правно лице, пријавените пет вработени во општината излегле на местото, бил изготвен записник за увид на местото, во кој спротивно на Законот за градењето и Законот за утврдување правен статус на бесправно изградените објекти констатирале дека наводно објектите за спорт и рекреација – тениски игралишта – ги исполнуваат условите за нивна легализација, иако објекти од ваков вид се привремени и не може да бидат предмет на легализација, по што изготвиле и заедно со пријавениот градоначалник потпишале урбанистичка согласност, а по плаќањето на одредениот данок на имот, изготвиле и потпишале решение за утврдување правен статус на бесправен објект“,
се наведува во соопштението на полицијата.
На тој начин, додаваат оттаму, му овозможиле на пријавеното правно лице да ги запише наводно бесправните објекти во вкупна површина од 3 993 квадратни метри, односно да стекне противправна имотна корист во износ од 147 341 700 денари.