Изјавата дека бизнис-секторот не добил ништо е дадена без консултација, бизнисмените и стопанските комори имаат спротивен став, вели Мицкоски

Мицкоски рече дека е изненаден од изјавата на Трајкоска и побарал мислење од други бизнисмени и стопански комори, од каде што добил спротивен став

Премиерот Христијан Мицкоски вели дека изјавата дадена од претседателката на Организацијата на работодавачи на Македонија, Владанка Трајкоска, дека бизнис-секторот е незадоволен од политиките на Владата во првите 100 дена, е дадена без консултација со никој од работодавачите.

Мицкоски рече дека е изненаден од изјавата на Трајкоска и побарал мислење од други бизнисмени и стопански комори од каде што добил спротивен став.

„Тоа беше изјава на Организацијата на работодавачи и јас се изненадив, да бидам искрен, и велам да се јавам на неколкумина од бизнисмените и стопанските комори и тие имаа спротивен став и добро е да ги прашате да го кажат нивниот став. Добро е да прашате и зошто претседателката на Организацијата имаше таква позиција без да консултира никој од работодавачите“,

рече Мицкоски.

ССМ и работодавачите незадоволни од првите 100 дена на Владата: Утре ќе биде 101. ден и повторно ништо нема да се смени  

Тој не даде одговор дали изминатите два дена седнале да поразговараат со бизнис-секторот за да видат на што се темели изјавата на Трајкоска, дека нивните очекувања од новата влада биле многу големи, а не добиле ништо.

Трајкоска во вторникот, кога се одбележаа 100 дена од новата влада, рече дека очекувањата од неа биле дека ќе има сенс за бизнисот, за сите оние кризи со кои се соочуваат во работењето. Меѓутоа, рече таа, она што се зборува во изминатиот период е само зголемување на платите на јавната администрација и земање кредити за општините и заобиколување на проблемите со кои се соочува стопанството во делот на продуктивноста и на немањето работна сила.

Незадоволство изразија и од Сојузот на синдикати на Македонија (ССМ) од каде што рекоа дека во првите 100 дена од Владата требало да седнат на заедничка маса и да ги разговараат сите важни прашања, како растот на платите.

Од ССМ сметаат дека 25 илјади работници кои примаат плата од 22 567 денари е некоректно, односно нечовечки да ја примаат како таква, а како кривично дело од страна на работодавачите го оценуваат она што 10 илјади работници примаат плата од еден денар до 22 567 денари.