„Не ни остана друг избор освен да одговориме. Ако Израел сака да реагира, ќе имаме посилен одговор, тоа е она на што се залага Исламската Република“, рече иранскиот претседател Масуд Пезешкијан еден ден по нападот на Иран врз Израел
Не бараме војна, но одговорот ќе биде посилен ако Израел возврати по вчерашниот напад, изјави иранскиот претседател Масуд Пезешкијан еден ден откако Иран истрела ракети на израелска територија.
Пезешкијан обвини оти Израел поттикнува несигурност во регионот и ги осуди „историските злосторства“.
„Не ни остана друг избор освен да одговориме. Ако Израел сака да реагира, ќе имаме посилен одговор, тоа е она на што се залага Исламската Република“,
изјави иранскиот претседател.
Дека „каков било одговор на Израел нема да остане неказнет“ изјави и иранскиот претставник во Обединетите нации, Амир Саид Иравани, оценувајќи оти „Израел едиствено го разбира јазикот на смртта“. Порача оти вчерашниот напад бил „неопходен и пропроционален одговор на израелските агресивни акти на Блискиот Исток“.
„Секој чин на воздржаност преземен од Иран само го охрабри Израел да изврши уште поголеми злосторства и повеќе акти на агресија. Следствено, одговорот на Иран беше неопходен за да се врати рамнотежата“,
порача иранскиот претставник во ОН, Амир Саид Иравани.
По вчерашниот ракетен напад на Израел, израелскиот премиер Бенјамин Нетанјаху рече оти Иран направил голема грешка и дека ќе плати за тоа.