Директорите на Детската клиника и на Токсикологија велат дека во нивните клиники се хоспитализирани две деца и петмина возрасни и оти сите се во стабилна состојба
Триесет и едно лице со вдишан чад побарале помош на Клиниката за токсикологија од 3:30 часот утринава досега, вели за „360 степени“ директорот Андон Чибишев.
На Детската клиника, пак, утринава биле донесени 12 деца на возраст од пет месеци до 11 години, кои имале вдишано чад. Директорот на Клиниката, Реџеп Мемеди, вели дека сите деца биле примени во Ургентниот центар на Детска клиника каде што биле прегледани и каде што им се направени соодветни анализи.
„Неколку од децата беа приклучени на кислородна поддршка, а останатите беа во стабилна состојба. По направените анализи две деца, што се на возраст од пет месеци и шест години се задржани на опсервација која ќе трае до утре. Останатите деца, на барање на родителите се пуштени дома иако ние инсистиравме и тие да бидат задржани на следење до утре“,
вели Мемеди во изјава за „360 степени“.
Возрасните лица и децата што побарале помош на овие две клиники, чадот го вдишале во пожарот што во текот на ноќта се случи во подрумски простории во зграда во скопски Чаир.
Од лицата што побарале помош на Клиниката за токсикологија, Чибишев вели дека пет пациенти се хоспитализирани затоа што кај нив била утврдена потешка клиничка слика.
„Четворица мажи и една жена се хоспитализирани, нивната состојба е стабилна, но ќе останат неколку дена на Клиниката за следење на состојбата и за понатамошни испитувања“,
вели Чибишев.
На останатите лица што побарале помош, од кои 10 биле жени, а 16 мажи, Чибишев вели дека им била дадена терапија и тие во стабилна состојба биле пуштени дома.
Во однос на старосната возраст на пациентите, Чибишев рече дека немаат информации затоа што повеќето од лицата што побарале помош на нивната клиника немале со нив документи.
Пожарот во скопската населба Чаир бил пријавен ноќеска во 1:50 часот. Според информациите од полицијата пожарот избувнал во подрумски простории во зграда, а биле зафатени и дуќани.
Во гаснењето на пожарот интервенирале 20 пожарникари со седум противпожарни возила.
Од МВР потврдија дека на Клиниката за токсикологија со вдишан чад биле однесени и еден пожарникар и еден полициски службеник.
Станарите од зградата беа евакуирани од утрово во 6:30 часот преку кровот на зградата од каде беа симнати со посебни скали на противпожарно возило. Ниту еден од станарите што биле евакуирани немал повреди.