Ова е осмо поднесено обвинение за градоначалникот на Струга. Покрај за несовесно работење, против него има обвиненија и за бесправно градење, како и за фалсификување исправа
Струшкото основно јавно обвинителство поднело обвинителен предлог против актуелниот градоначалник на Општина Струга, Рамиз Мерко, поради незаконско именување в.д. директор на основно училиште на територијата на Општината.
Како што е наведено во соопштението од Обвинителството, обвинителниот предлог се однесува на кривичното дело несовесно работење во службата од член 353-в од Кривичниот законик.
Обвинетиот, како што велат од Обвинителството, се товари за несовесно работење во службата бидејќи донел решение со кое за в.д. директор на основно училиште во селото Подгорци именувал лице што не ги исполнувало условите. Конкретно, како што наведуваат од Обвинителството, лицето немало работно искуство од најмалку пет години во воспитно-образовна работа, како што предвидува Законот за основно образование.
Лицето што било поставено за директор на училиштето функцијата ја вршело во периодот од 12.01.2022 до 31.07.2023 година. За тој период, додаваат од Обвинителството, биле исплатени плати и придонеси за в.д. директорот, со што на училиштето му била нанесена финансиска штета.
Ова е осмо поднесено обвинение за градоначалникот на Струга. Покрај за несовесно работење, против него има обвиненија и за бесправно градење, како и за фалсификување исправа.
На судското рочиште што се одржа во јуни годинава, каде што на Мерко му се судеше за незаконско назначување в.д. директори во три основни училишта во општината, тој се изјасни дека не се чувствува виновен за кривичните дела за кои е обвинет велејќи дека со тоа обезбедил континуитет на работата на училиштата.
Покрај обвиненијата за незаконски назначувања на директори, струшкиот градоначалник е обвинет и за злоупотреба на службената положба и овластување за набавката на службеното луксузно возило „ауди а6“ од 67 000 евра на трошок на Општината во услови кога таа се наоѓаше во долгови и со блокирана сметка, а обврските и се сервисираа преку релоцирање средства од централниот буџет на државата.
Името на Рамиз Мерко во јавноста се реактуализира минатото лето кога американскиот Стејт департмент го стави на „црната листа“ на САД поради вмешаност во значителна корупција, а од почетокот на годината против него почнаа да се редат обвиненија.