Според лидерот на опозицијата, францускиот предлог е сплет на комплексни документи, во што влегуваат Преговарачката рамка и Договорот за добрососедство, за што вели дека е сериозна победа на нашата дипломатија
Жалам што оваа влада дојде на власт со една голема лага, дека ќе ги подобри условите и нашата позиција во преговорите со Европската Унија. Не само што не прават ништо по тоа прашање, туку и ги влошуваат условите. Ниту кажуваат како оваа земја ќе продолжи напред, ниту со каква временска динамика, ниту, пак, премиерот, ВМРО-ДПМНЕ и целата владина коалиција ЗНАМ и „Вреди“ кажуваат дали има друга алтернатива или ќе останеме целосно изолирани како слепо црево на Балканот. Ова денеска на прес-конференција за првите 100 дена од мандатот на Владата го рече лидерот на опозицискиот СДСМ, Венко Филипче, коментирајќи ја последната одлука на земјите членки на Европската Унија за одвојување на Албанија и Северна Македонија од евроинтеграцискиот пат.
„Сè што направија изминатите 100 дена по тоа прашање е да ги влошат нашите релации, прво со Грција, а и со Бугарија да дојдеме до ситуација кога нова резолуција е усвоена во бугарскиот парламент“,
рече тој.
Според него, францускиот предлог е сплет на комплексни документи, во што влегуваат Преговарачката рамка и Договорот за добрососедство, за што вели дека е сериозна победа на нашата дипломатија.
„Од билатерално прашањето со Бугарија се издигнува на ниво на дискусија со ЕУ. Потоа, Договорот за добрососедство по својот концепт на добри релации со соседите е нешто што влегува во копенхашките критериуми. Сериозен успех на дипломатијата е што за разлика, на пример со Србија, каде што релациите со Косово се во посебно поглавје, овој договор и неговото почитување практично е само во општиот дел на Преговарачката рамка. Така што, јасни се принципите по кои нашата земја треба да оди напред“,
рече тој.
Тоа што, според Филипче, јасно ќе биде детерминирано бугарското малцинство во Уставот, е една сериозна придобивка, со што првпат по повеќе децении паѓа во вода еден дел од бугарската политика дека сме еден народ поделен во две држави.
„Што значи дека од национални на ниво на идентитет, тие прашања се сведени на ниво на малцинство“,
вели лидерот на СДСМ.
Според Филипче, информациите со кои располага е дека на премиерот Христијан Мицкоски на состанокот со претседателот на Европскиот совет Шарл Мишел јасно му било кажано оти не може да смета на тоа уставни измени да се донесат и прифатат со одложено дејство ниту, пак, да има можност за менување на Преговарачката рамка.
„Затоа, јасно треба да кажат каков план имаат со цел да ја движат државата напред“,
рече тој.
Филипче на прес-конференцијата, осврнувајќи се на работата на власта во првите 100 дена од преземање на мандатот, рече дека Мицкоски одлучи еднострано да ги прекине преговорите со ЕУ, како државата да е негова своина.
Најавите за дестабилизација во државата Филипче ги оцени како политика за дефокус на јавноста од вистинските проблеми.
„Ако тие најави се сериозни, тогаш власта треба да се однесува поинаку. На пример, после првата најава за дестабилизација премиерот замина на одмор. Претседателката нема намера да го свика Советот за безбедност. Сè е тоа една политика. Гледате дека пред очи ни бега возот за ЕУ, одделени сме од Албанија и остануваме во групата за преговори со Молдавија и БиХ. Јас во тие работи навистина не верувам“,
вели лидерот на опозицијата.