„Гардијан“, пренесувајќи фотографии од последните неколку часа, пишува дека Израел утринава извршил напади и врз либанската престолнина, јужниот дел на земјата и наводно во Дамаск
Израелската војска информира дека започнала ограничени, локализирани и насочени копнени напади врз цели и инфраструктура на Хезболах во Јужен Либан, се вели во соопштението од ИДФ објавено на нивниот профил на Икс.
Во соопштението се додава дека нападот е во согласност со одлуката на политичкиот врв и оти се одвива врз основа на прецизни разузнавачки информации.
„Овие цели се наоѓаат во селата близу границата и претставуваат непосредна закана за израелските заедници во северен Израел“,
се додава во соопштението.
In accordance with the decision of the political echelon, a few hours ago, the IDF began limited, localized, and targeted ground raids based on precise intelligence against Hezbollah terrorist targets and infrastructure in southern Lebanon. These targets are located in villages…
— Israel Defense Forces (@IDF) September 30, 2024
Израелската војска соопшти и дека нејзините воздушни сили ги поддржуваат копнените сили со прецизни напади врз воени цели.
„Гардијан“, пренесувајќи фотографии од последните неколку часа, пишува дека Израел утринава извршил напади и врз либанската престолнина, јужниот дел на земјата и наводно во Дамаск.
Според израелските медиуми, известувања за воздушен напад имало во дел од северен Израел, а „Тајмс оф Израел“ објави дека се огласиле предупредувања за ракети во северниот град Метула, во близина на границата со Либан.
Засега нема извештаи за повредени лица или за материјална штета.
ИДФ соопшти дека три проектили биле откриени во северен Израел од кои два биле пресретнати од израелската противвоздушна одбрана, а третиот паднал на отворен простор.
Израелската војска не соопшти детали за тоа колку долго ќе трае операцијата, но се вели дека војниците се подготвувале со месеци.
„Операцијата ‘Северни стрели’ ќе продолжи според проценката на ситуацијата и паралелно со борбите во Газа и во другите делови. Израелската војска продолжува да дејствува за да ги постигне целите на војната и прави сè што е потребно за да ги одбрани граѓаните на Израел и да ги врати граѓаните во северен Израел во своите домови“,
се додава во соопштението од ИДФ.
Израелскиот премиер Бенјамин Нетанјаху вчера на состанок на владата изјавил дека, и покрај неодамнешните воени успеси, Израел сè уште се соочува со значителни предизвици.
Нетанјаху ги поздравил војниците на ИДФ и оценил дека тие се неверојатни во нападите врз непријателите на Израел и во подигањето на моралот на народот. Тој, исто така, изразил сочувство до ужалените семејства и на „драгите семејства на заложниците“.
Палестинската милитантна група Хамас соопшти дека во вчерашниот израелски напад е убиен нивниот водач во Либан, Фатех Шериф Абу ел-Амин. Тој бил убиен заедно со неговите сопруга, син и ќерка, во нападот што бил насочен кон нивната куќа во палестинскиот бегалски камп во јужниот град Тир, пренесува Ројтерс.
Народниот фронт за ослободување на Палестина (ПФЛП), милитантна група која учествува во борбата против Израел, пак, соопшти дека тројца негови водачи биле убиени во напад што го таргетирал округот Кола во Бејрут, место во градот каде што се собираат такси-возила и автобуси.
Во израелскиот напад загинаа членот на политичкото биро и шеф на воено-безбедносниот оддел, Мохамед Абед Ал-Ал, членот на воениот оддел и воената команда во Либан, Имад Одех, и Абдул Рахман Абед Ал-Ал.
Во засилените израелски бомбардирања во текот на две недели загинаа низа највисоки функционери на Хезболах, вклучувајќи го и нивниот лидер Хасан Насралах.