Тој додаде дека МВР ги има соодветните капацитети за да одговори на начин на кој што ќе биде потребно, со цел сите граѓани да се чувствуваат безбедно и мирно и во рамки на тој безбеден и мирен систем да ги остваруваат своите права
Министерот за внатрешни работи Панче Тошковски вели дека обидите за подгревање на меѓуетничките тензии се реалност на која досега соодветно е одговорено, а исто ќе биде и во иднина доколку има потреба за тоа.
„Сето она што сме го говореле во минатото од аспект на обиди од кои што видовме дел од нив и во минатото, во овие да речам месец дена, од аспект на обиди за подгревање на меѓуетнички тензии, дека се реалност, соодветно одговоривме, соодветно ќе одговориме и во иднина“,
рече министерот.
Тошковски, кој денеска беше на отворањето на регионален центар за обука во полицискиот центар во Ѓорче Петров, уверува дека Министерството за внатрешни работи е подготвено да одговори на предизвици кои ќе бидат насочени кон дестабилизација на земјата.
„Министерството за внатрешни работи е подготвено на секакви предизвици во иднина. Предизвици кои што ќе бидат насочени кон дестабилизација на Македонија, доколку ги има како такви во реалноста во иднина жестоко ќе одговори“,
рече Тошковски.
На новинарско прашање дали МВР има информација дека се подготвува дестабилизација, Тошковски посочи дека службите проследуваат соодветни информации до надлежните.
„Многупати досега беше истакнато во јавноста дека службите во рамки на институционалните форми кои што ги имаме во државата, а се занимаваат со овој тип на надлежност, проследуваа и проследуваат соодветни информации до надлежните раководни органи во рамки на истите, а истите како такви беа споделувани соодветно и со премиерот и со претседателката“,
додаде тој.
Тој додаде дека МВР ги има соодветните капацитети за да одговори на начин на кој што ќе биде потребно, со цел сите граѓани да се чувствуваат безбедно и мирно и во рамки на тој безбеден и мирен систем да ги остваруваат своите права.
Тошковски рече и дека МВР во изминатиот период има отворено голем број на истраги и додаде оти ќе има резултати и соодветно ќе биде одговорено.