„Имаа доволно време, осум години, да ги решат, но не ги решија и сега злоупотребуваат и судска власт за дневна политика. За жал, ги инструментализираат за дестабилизација и за сеење магла за да се спасат од одговорност“, вели вицепремиерот и министер за животна средина и просторно планирање
Првиот вицепремиер и министер за животна средина и просторно планирање Изет Меџити смета дека во првите 100 дена откако е формирана Владата се соочиле со деструктивна опозиција за која вели дека секојдневно критикува, со право и без право.
Меџити вели дека првите 100 дена ѝ се даваат на Владата за да ги постави луѓето и за да почне со работа.
Опозицијата, вели тој, овие 100 дена отворила проблеми од минатото кои не биле затворени додека токму тие биле на власт.
„Се соочивме со деструктивна опозиција која секојдневно критикува, со право и без право. Воедно, отвори некои работи од минатото кои не ги затвори како што треба, како што се законот за јазици, ‘балансерот’, Бадентер. Имаа доволно време, осум години, да ги решат, но не ги решија и сега злоупотребуваат и судска власт за дневна политика. За жал, ги инструментализираат за дестабилизација и за сеење магла за да се спасат од одговорност“,
рече Меџити денеска одговарајќи на новинарско прашање во врска со првите 100 дена од формирањето на Владата.
Тој додава дека и покрај таквата ситуација биле посветени на ветувањата и исполнување на програмата.
Според Меџити, евроинтеграцискиот процес и условот што земјава треба да го исполни за негово продолжување беше, е и ќе остане еден од клучните приоритети на Владата.
Тоа, рече тој, е единствената алтернатива за сите граѓани, а оваа власт има демократски капацитет и знае како да оди по овој пат.
Дополнувајќи го одговорот за првите 100 дена од формирањето на Владата, Меџити се осврна на дел од законите што се донесени изминатиот период.
„Има силна борба против казино-бизнисот, легален и нелегален, посебно за нелегалните концесии што ги даде заменик-премиерот Груби, има и владина Одлука за бескомпромисна војна со казино-бизнисот на црно, што е проблем и за регионот, онлајн казината се укинаа целосно и ќе носиме нов закон кој ќе биде многу построг во однос на овој бизнис кој е на штета на граѓаните. Во овие 100 дена, исто така, имаше одлука на Владата и за 35 милиони евра за Универзитетот ’Мајка Тереза’ со што покажуваме дека сме посветени на подобро и поквалитетно образование зашто инвестиција во човечкиот фактор е најдобрата инвестиција и така ќе продолжиме на сите нивоа на образование“,
рече Меџити.
Тој напомена и дека од сите 80 општини веќе има апликации за проекти за конкретни решенија за проблеми со кои се соочуваат граѓаните.
„Ќе се доделат 100 милиони евра оваа година, а 900 милиони во наредните 3-4 години. Со ова покажавме дека сме посветени на децентрализацијата која е најблиска власт на граѓаните и столб на Рамковниот договор“,
додаде вицепремиерот.
Тој најави и дека на граничните премини „Табановце“, „Блаце“ и „Ќафасан“, ќе има едно застанување, со што вели дека значително ќе се олесни протокот на луѓе и стоки и ќе се намалат долгите чекања.