Министерот за надворешни работи и надворешна трговија вели, имаат начелна согласност со претседателката и со премиерот
Наскоро ќе започне процес на консултации за именување на амабасадори и пополнување на амбасадите и конзултатите со персонал, најави министерот за надворешни работи и надворешна трговија, Тимчо Муцунски.
Во интервју за МИА, Муцунски рече дека имаат начелна согласност со претседателката и со премиерот.
„Правиме план за распределба на дипломати внатре од Министерството за надворешни работи кои треба да бидат упатени во следниот период во дипломатско-конзуларните претставништва, а имам начелна согласност и со претседателката и со претседателот на Владата дека по моето враќање од ова патување ќе го отпочнеме процесот на консултации за именување на амбасадори и пополнување на дел од амбасадите и генералните конзулати каде што се испразнети или наскоро ќе бидат испразнети од највисоките функции“,
изјави Муцунски.
Според Муцунски, неговиот претходник Бујар Османи имал несоодветна распределба на капацитетите.
„Како најкласичен пример го давам фактот што имаме само двајца дипломати во нашата амбасада во Вашингтон, амбасадор плус уште еден помлад дипломат, во земја која е наш стратешки партнер и со којашто негуваме одлични односи не само во политиката туку и во делот на одбранбената и безбедносната политика, во делот на економијата и сите оние други прашања. Вклучително, ова е и држава каде што имаме и голема дијаспора“,
вели шефот на дипломатијата.
За тоа кои амбасади се најприоритени, министерот вели дека немаме амбасада или конзулат кој не ни е приоритет. Ги издвојува Париз, Постојаната мисија на ОН…
„Имаме средна, веројатно и соодветна дипломатска мрежа на ДКП, но не смееме да оставаме ниедно ДКП празно бидејќи статусот на ДКП кога има амбасадор или генерален конзул е помоќен отколку ако има само вршител на должност. Секако, би издвоил дека ние сè уште немаме амбасадор во Париз, Франција е значајна земја. Како што знаете, испразнета ни е постојаната мисија со враќањето на амбасадорот Фрчкоски, испразнета ни е и позицијата во ОН, но ќе повторам, нема земја којашто не ни е значајна“,
вели министерот во интервјуто.