Американскиот дипломат Ричард Гренел, со кого Муцунски гостувал во живо на телевизијата, се смета за човек од доверба на поранешниот претседател на САД, Доналд Трамп, и еден од најсериозните кандидати за државен секретар доколку Трамп победи на ноемврските избори
Ние секогаш ќе бидеме на линија со надворешната политика на САД бидејќи сметаме дека е вистинската надворешна политика што обезбедува мир во светот и зачувување на светскиот поредок.
Ова, меѓу дргугото, го истакнал министерот за надворешни работи и надворешна трговија, Тимчо Муцунски во гостување во живо на американската телевизија Њузмакс.
Муцунски, кој е во работна посета на Соединетите Американски Држави и дел од македонската делегација на 79. Генерално собрание на Обединетите нации (ОН), во разговорот за телевизијата гостувал заедно со американскиот дипломат Ричард Гренел.
Фокусот на разговорот, како што соопштија од Министерството за надворешни работи и надворешна трговија, бил ставен на актуелниот геополитички контекст и перспективата на земјава во рамките на светските случувања.
Муцунски, во таа насока, ја потенцирал важноста за одвојување на најмалку 2 проценти од бруто-домашниот производ (БДП) во одбраната. Овој принцип, како што рекол министерот, го почитува и нашата влада бидејќи не станува збор за проактивен метод, туку за средства наменети за одбраната, што е клучен аспект во политиката на НАТО.
Говорејќи за односите помеѓу земјава и САД, шефот на македонската дипломатија истакнал дека двете страни имаат одлични односи кои се базираат на стратешкото партнерство.
„Ние секогаш ќе бидеме на линија со надворешната политика на САД бидејќи сметаме дека е вистинската надворешна политика што обезбедува мир во светот и за зачувување на светскиот поредок. Мораме да најдеме мир и ги сметаме САД за клучна нација во постигнувањето на мирот“,
рекол Муцунски во интервјуто.
Во однос на сложената геополитичка состојба во светот, министерот ја нагласил неопходноста од поголеми и поинтензивни дипломатски напори за да се обезбеди мир во светски рамки. Овие напори, според Муцунски, треба да бидат во согласност со принципите на Маѓународното јавно право и воедно да бидат гарантирани територијалниот интегритет и суверениетот на сите нации.
Министерот за надворешни работи и надворешна трговија рекол оти е среќен што не сите, но сè повеќе нации почнуваат да зборуваат за мир.
„Клучниот договор тука е да се најде дипломатско решение, не по секоја цена. Основно тврдам, доаѓајќи од регион кој треба да ги почитува принципите на меѓународното јавно право, дека ни е потребен мир, ни е потребно дипломатско решение, но такво решение што не ѝ дозволува на друга нација да ги уништи територијалниот интегритет и суверенитет на друга нација“,
заклучил Муцунски во интервјуто за телевизијата Њузмакс.
Инаку, американскиот дипломат Ричард Гренел, со кого Муцунски гостувал во живо на телевизијата, летово имаше чести средби со премиерот Христијан Мицкоски, министерот Муцунски и други претставници на Владата.
Гренел во американските медиуми се опишува како човек од доверба на поранешниот претседател на САД и актуелен републикански кандидат за нов мандат во Белата куќа на ноемвриските избори. Тој својата функционерска кариера за време на мандатот на Трамп ја почна како амбасадор на САД во Германија, а потоа и како специјален пратеник за Балканот. Во 2020 г. Гренел беше назначен за в.д. директор на Националното разузнавање на САД, позиција од која ја координираше работата на 17 разузнавачки агенции.
Ако Доналд Трамп победи на претседателските избори во ноември, Гренел се смета меѓу најсериозните кандидати за позицијата државен секретар.