Според Касами, коалицијата „Вреди“ функционира одлично, а за односите во владината коалиција вели дека имаат многу заеднички точки, но и нешта за кои се разликуваат
Владината коалиција е коректна и покрај несогласувањата околу законот за бранителите, вели градоначалникот на Тетово и претседател на движењето „Беса“ кое е дел од коалицијата „Вреди“ која партиципира во Владата.
Според Касами, коалицијата „Вреди“ функционира одлично, а за односите во владината коалиција вели дека имаат многу заеднички точки, но и нешта за кои се разликуваат.
„Ние може да гарантираме дека сè додека ‘Вреди’ е дел од владината коалиција, нема да има уназадување на правата на Албанците“,
вели Касами.
Што се однесува до законот за бранителите, кој изминатиот период предизвика многубројни реакции меѓу политичките партии, Касами вели дека во време кога Демократската унија за интеграција (ДУИ) била на власт најмалку три пати е променет законот каде што се дадени права на бранителите и ДУИ, како што вели тој, никогаш не кренала глас.
„Имаше изјава на еден функционер на претходната Влада кој тврди дека и овие измени кои сега се обидуваат СДСМ и ДУИ да ги протуркаат биле веќе договорени со Али Ахмети. Затоа го повикувам да не биде дволичен, нека признае дека, сè што е дадено на бранителите, а не е дадено на војниците на ОВК, е придобивка на Али Ахмети. И тој треба да излезе и како маж да го каже тоа“,
рече Касами.
Изјавата на Касами дека односите во владината коалиција е коректни се совпаѓа со таа што ја даде и неговиот партнер од „Вреди“, Арбен Таравари. Таравари рече дека односите меѓу владините партнери се коректни и оти Владата ќе продолжи да функционира, но потребна е почеста консултација и синхронизација меѓу партиите во власта.
Изјавите на Касами и Таравари се однесуваат на последната изјава на пратеникот Халил Снопче, кој рече дека „Вреди“ ќе излезе од владината коалиција ако се изгласа законот за бранители.
Според Таравари, реакцијата на Снопче во врска со законот за бранители била како што треба, но се надева дека владиното мнозинство ќе има координација за надминување на овој, како што рече, ситен проблем, за кој прстот го впери во СДСМ и ДУИ оценувајќи дека се координирани „да подметнуваат искри во владејачката коалиција“.
Законот за бранителите изминатиот период предизвика многубројни реакции меѓу политичките партии и во јавноста.
Откако претседателката на Комисијата за социјална политика, демографија и млади, Илире Даути, од Алијанса за Албанците, која е дел од коалицијата „Европски фронт“ предводена од ДУИ, минатата недела одби да закаже седница на ова собраниско тело за предлог-законот за бранителите, тоа не го стори ниту претседателот на Собранието, Африм Гаши, како што налага Деловникот за работа на законодавниот дом.
Пратеничката Славјанка Петровска рече дека пратениците на СДСМ ќе бараат Комисијата за деловнички и мандатно-имунитетни прашања да расправа дали претседателот на законодавниот дом, Африм Гаши го прекршил Деловникот за работа на Собранието со незакажувањето на Комисијата за социјална политика, демографија и млади за Предлог-измените на Законот за посебните права на припадниците на безбедносните сили и членовите на нивните семејства.
Потпретседателот на Собранието од редовите на Социјалдемократскиот сојуз на Македонија (СДСМ), Јован Митрески, вчера рече дека до собраниската архива поднел барање собранискиот спикер Африм Гаши да ја задолжи Комисијата за деловнички и мандатно-имунитетни прашања да свика седница каде што ќе се толкува примената на членот 126 став 3 од Деловникот во однос на предлог-законот за посебните права на припадниците на безбедносните сили и членовите на нивните семејства.
Претседателот на Собранието, Африм Гаши, денеска на брифинг со новинарите рече дека нема намера да ја свика Комисијата за социјална политика, демографија и млади на која ќе се разгледува предлог-законот за изменување и дополнување на Законот за посебните права на припадниците на безбедносните сили и на членовите на нивните семејства по скратена постапка, откако тоа претходно не го стори претседателката на ова собраниско тело, Илире Даути.
Гаши остана на претходно искажаниот став дека седница веќе била свикана и дека тој не можел да се меша во дневниот ред на истата.