Според директорот на ФЗО, долгот сега се намалува благодарение на ребалансот на буџетот и на заштедите на Фондот, од пет на три милијарди денари и на тој начин тој ќе биде на едно одржливо ниво, кое нема да биде закана за здравствените установи
На 30 јуни годинава 109 јавни здравствени установи имаа долг од пет милијарди денари. Зголемување од една милијарда денари имаше само во првото полугодие од годината. Долгот можеше сериозно да ја загрози работата на здравствените установи и да доведе до блокирање на сметките на некои здравствени установи. Ова денеска го рече Сашо Клековски, директорот на Фондот за здравствено осигурување (ФЗО) пред премиерот Христијан Мицкоски, кој беше во посета на оваа институција, посочувајќи дека благодарение на ребалансот на буџетот, долгот ќе се намали за две милијарди денари, со што тој ќе биде на стабилно ниво.
„На средбата со премиерот разговаравме за тоа што имаме направено во првите 100 дена од Владата. Му го презентиравме нашиот план за намалување на долговите на јавните здравствени установи. Нивото на долгот од 81 милион евра на овие установи можеше да го загрози редовното работење, а во некои доведе и до блокирање на сметките и на работата“,
рече тој.
Посочи дека е развиен план за намалување на долговите, кој има два столба.
„Едниот е за зголемена контрола, за да разбереме кои се причините за тој долг. За потсетување, 2007 година јавното здравство е исчистено и е оставено без долгови. Но, ете, тој долг повторно се креирал. Во јавноста презентирав повеќе причини за тој долг, од несоодветни приходи, за што класичен пример е Клиниката за онкологија, до недомаќинско работење на здравствените установи“,
вели Клековски.
Според него, долгот сега се намалува благодарение на ребалансот на буџетот и на заштедите на Фондот, од пет на три милијарди денари и на тој начин тој ќе биде на едно одржливо ниво, кое нема да биде закана за здравствените установи.
„Од 109 здравствени установи, една третина од нив ќе имаат целосно расчистен долг. Тоа главно се здравствените домови низ државата. Повеќе ќе бидат значително олеснети, односно ќе биде отстранета опасноста од блокади“,
рече директорот на ФЗО.
Злоупотребите што ги откриле преку контролите во јавноздравствените установи, Клековски најави дека ќе ги достават до Министерството за внатрешни работи (МВР и до Финансиската полиција), за да ги погледнат од кривичноправен аспект врз основа на обезбедените докази.
Според премиерот Мицкоски, Владата подготвува план за уште повеќе да го намали овој долг во наредната фискална година.
Клековски досега неколкупати во јавноста излезе со примери на злоупотреби на плати и надоместоци во здравствените установи.
„Директор користел патни трошоци од речиси 500 илјади денари во 10 месеци, за што нема никаков документ. Друг директор си ја зголемил платата за 400 илјади денари за една година, за што нема никаква законска основа. Во Центар за јавно здравје се исплаќале плати врз основа на колективен договор што не постои, значи се давале измислени плати“,
рече тој.
За најголеми должници ги посочи универзитетските клиники за радиологија и онкологија, торакална и васкуларна хирургија и гинекологија, како и неколку болници надвор од Скопје, како во Прилеп и Охрид.