Со цел безбедно и непречено одвивање на предвидените активности, дел од улиците во Охрид овие два дена ќе бидат под посебен сообраќаен режим
Унгарскиот премиер Виктор Орбан утре и задутре ќе престојува во Охрид во рамки на својата официјална посета на земјава. Со цел безбедно и непречено одвивање на предвидените активности, дел од улиците во Охрид овие два дена ќе бидат под посебен сообраќаен режим, информираат од охридската полиција.
„На 26 и 27.09.2024 година (четврток и петок), на улиците ‘Илинденска’ и ‘Коста Абраш’ ќе биде забрането запирање и паркирање на патнички и други моторни возила, а во тек на движење на возилата во состав на делегациите, привремено за сообраќај ќе биде затворен дел од магистралниот пат Кичево-Охрид, од аеродромот до клучката кај ‘Распаќе’, булеварите ‘Туристичка’ и ‘Македонски просветители’, улиците ‘Абас Емин’ и ‘Кирил и Методиј’ како и регионалниот пат Охрид-Св.Наум. На 27.09.2024 година, безбедносните мерки во сообраќајот ќе бидат преземани и на подрачјето на Пештани и Љубаништа“,
информираат од СВР Охрид.
Дополнително, оттаму ги информираат граѓаните да ги дислоцираат своите возила од паркинг-местата на булеварот „Туристичка“ и улиците „Коста Абраш“, „Цар Самуил“ и кеј „Македонија“.