Обвинетата, како што велат од Обвинителство, во мај годинава, додека била организациски директор на Токсикологија, прекршувајќи три закони, овозможила 17 лица да бидат ангажирани со договор на дело, а за тоа да земаат паричен надоместок од буџетот на Клиниката
Против поранешната организациска директорка на Клиниката за токсикологија Бесија Иљази е поднесен обвинителен предлог за злоупотреба на службената положба и овластување, информираат од Јавното обвинителство.
Иако во соопштението на Обвинителството не се споменува идентитетот на обвинетиот ексорганизациски директор на Токсикологија, сепак, извесно е дека станува збор за Иљази која пролетоска беше во фокусот на јавноста поради сомневања за незаконско ангажирање лица на Клиниката.
Обвинетата, како што велат од Обвинителство, во мај годинава, додека била организациски директор на Токсикологија, прекршувајќи три закони, овозможила 17 лица да бидат ангажирани со договор на дело, а за тоа да земаат паричен надоместок од буџетот на Клиниката.
„Организациската директорка постапила спротивно на Законот за спречување корупција и судир на интереси, Изборниот законик и Законот за здравствена заштита. Во мај годинава склучувала договори за дело со лицата за нивно работно ангажирање на Клиниката, по што ретроактивно издавала платни налози со кои им исплаќала месечен надомест за нивен претходен наводен работен ангажман“,
се наведува во соопштението од Обвинителство.
Освен овие лица, обвинетата на списокот додавала и лица со кои воопшто не бил склучен договор за дело и на кои исто така им се исплаќал надомест за наводно извршени работи.
На овој начин, додаваат од Обвинителство, буџетот на Клиниката бил оштетен за сума од 659 781 денар, а истовремено на ангажираните лица им била овозможена противправна имотна корист.
Во јули годинава Министерството за внатрешни работи (МВР) поднесе кривична пријава за Иљази под сомнение дека ја злоупотребила службената положба и овластувањата што ги имала и ја оштетила установата за износ од 659 781 денари.
Иљази, како што информираат од Министерството за внатрешни работи (МВР), со намера да овозможи противправна имотна корист за 17 лица, пречекорувајќи ги своите службени овластувања на 15.5.2024 склучила 15 договори за дело со 15 лица кои биле работно ангажирани на Универзитетската клиника за токсикологија, но и со други лица кои биле без регулиран правна основа за нивно присуство на клиниката.
Клиниката за токсикологија пролетоска ја тресеа низа скандали. Неа ја предводеше само организациската директорка Бесија Иљази откако министерот за здравство Илир Демири на 14 мај го разреши медицинскиот директор д-р Данил Петровски.
Иљази додека беше директорка велеше дека Токсикологија има потреба од вработување на 18-те лица. Таа увидела дека Клиниката има потреба и затоа инсистирала да се направат договорите и рече дека се обидува максимално да го реши овој проблем. Таа додаде дека на 28 февруари било испратено барање до Министерството за здравство, кое било прифатено и од каде што добиле дозвола дека слободно може да се направат договорите.
Иљази велеше дека таа не може да биде обвинета за ништо, затоа што работи транспарентно и професионално, почитувајќи ги законите.
Од Државниот санитарен и здравствен инспекторат (ДСЗИ) на 22 мај извршија контрола на Клиниката за токсикологија, за да ја проверат валидноста на договорите за вработување кои се направени за 18-те лица што беа спорни во изминатиот период и рекоа дека предметот ќе го испратат до Министерството за здравство.
Контролата на Клиниката беше извршена откако на 2 мај од ДСЗИ издадоа решение во кое се забрани пристап на здравствени работници и работници кои немаат важечки договори за вработување и извршување здравствена дејност.