Израелската војска соопшти дека проектилот земја-земја бил пресретнат и оти нема извештаи за предизвикани штети или жртви
Сирените за тревога утрово се огласиле во Тел Авив и централен Израел, по што војската на земјата соопшти дека пресретнала проектил кој бил истрелан од Либан, пренесува Би-би-си.
Според израелскиот весник „Хаарец“ ова е првпат главниот град на Израел, Тел Авив, да биде цел на ракетен напад од Хезболах, кој доаѓа во период кога израелската војска продолжува со воздушните напади врз, како што тврди, позиции на милитантната група во јужен Либан.
Израелската војска соопшти дека проектилот земја-земја бил пресретнат и оти нема извештаи за предизвикани штети или жртви.
Во врска со нападот преку соопштение се огласи и Хезболах, од каде што велат дека утрово во 6:30 часот, по локално време, истрелале балистичка ракета кон Тел Авив како поддршка за храбриот и чесен отпор на Палестинците во Појасот Газа и во одбрана на Либан и неговиот народ.
Според милитантната група, проектилот бил насочен кон седиштето на израелската разузнавачка агенција Мосад, која Хезболах ја смета за одговорна за за убиствата на нејзини водачи и експлозиите на пејџери и други безжични уреди во Либан што се случија минатата недела.
И покрај обвинувањата, Израел досега не ја презеде одговорноста за овие напади.
Хезболах вчера потврди дека уште еден од неговите високи команданти бил убиен во израелските напади врз нивното упориште Дахиех, во Бејрут. Станува збор Ибрахим Кубаиси, висок претставник на Хезболах, одговорен за ракетните единици на групата.
Инаку, израелската војска утринава повторно ги повика жителите на јужен Либан да се евакуираат од местата што се наоѓаат во близина на позициите на Хезболах најавувајќи дека ќе продолжат со воздушните напади.
Кратко по објавата на веста дека е пресретната ракета насочена кон Тел Авив, а истрелана од Либан, израелските одбранбени сили (ИДФ) соопштија дека нивни борбени авиони пресретнале беспилотно летало кое утрово навлегло во Израел од Сирија.
Според информациите, дронот бил пресретнат над Галилејското Море и засега нема информации за евентуално предизвикани штети или настрадани.
Ескалацијата на тензиите на Блискиот Исток се една од главните теми на годинешното Генерално собрание на Обединетите нации (ОН) во Њујорк, САД.