„Бараме онака како што постапил во случајот со унгарскиот кредит, подеднакво да постапи и во овој случај. Во спротивно, нашите обвинувања дека сè е ова договор да не помине законот, како што тоа впрочем го кажаа и коалициските партнери на ВМРО-ДПМНЕ, за жал, ќе испаднат точни“, изјави денеска на прес-конференција пратеничката на СДСМ која е предлагач на законот
Петровска како чекор назад го оцени вчерашниот повик од ВМРО-ДПМНЕ пратениците од Социјалдемократскиот сојуз (СДСМ) кои се членови на Комисијата за социјална политика, демографија и млади да се потпишат на барањето до претседателката на ова тело, Илире Даути, да свика седница и предлог-измените на законот за бранителите да го стави на дневен ред
Пратениците на Социјалдемократскиот сојуз на Македонија (СДСМ) ќе бара Комисијата за деловнички и мандатно-имунитетни прашања да расправа дали претседателот на законодавниот дом, Африм Гаши го прекршил Деловникот за работа на Собранието со незакажувањето на Комисијата за социјална политика, демографија и млади за Предлог-измените на Законот за посебните права на припадниците на безбедносните сили и членовите на нивните семејства.
Ова денеска на прес-конференција во Собранието го соопшти пратеничката на СДСМ и поранешна министерка за одбрана Славјанка Петровска, која е подносител на предлог-измените на законот, кои предизвикаа многу реакции во политичките кругови и во јавноста.
Предлог-измените се во собраниска процедура, но се заглавени во Комисијата за социјална политика, демографија и млади, откако претседателката на ова работно тело Илире Даути, од Алијанса за Албанците, која е дел од коалицијата „Европски фронт“ предводена од ДУИ, одби да закаже седница, а тоа не го стори ниту претседателот на Собранието, Африм Гаши, како што налага Деловникот за работа на законодавниот дом.
Објаснувањето од Кабинетот на собранискиот спикер беше дека тој не може да закаже седница, бидејќи таа веќе била закажана и одржана. Но, седницата на оваа Комисија што ја посочија од кабинетот на собранискиот спикер не е со Законот за бранители на дневен ред, туку на оној за изменување и дополнување на Законот за пензиско и инвалидско осигурување.
„Она што ние ќе го направиме, исто така, согласно Деловникот, а е наше право е тоа дека ќе побараме да се свика Комисијата за деловнички и мандатно-имунитетни прашања која треба да расправа дали претседателот Гаши правилно го применува или не го применува Деловникот. Овде не станува збор за ништо друго освен за примена на Деловникот. Бараме онака како што постапил во случајот со унгарскиот кредит, подеднакво да постапи и во овој случај. Во спротивно, нашите обвинувања дека се е ова договор да не помине законот, како што тоа впрочем го кажаа и коалициските партнери на ВМРО-ДПМНЕ, за жал, ќе испаднат точни“,
изјави денеска пратеничката на СДСМ, Славјанка Петровска.
Истовремено, Петровска како чекор назад го оцени вчерашниот повик од ВМРО-ДПМНЕ пратениците од Социјалдемократскиот сојуз (СДСМ) кои се членови на Комисијата за социјална политика, демографија и млади да се потпишат на барањето до претседателката на ова тело, Илире Даути, да свика седница и Предлог-измените на Законот за бранителите да го стави на дневен ред.
„Наместо од ДПМНЕ да уценуваат со писма кои постапката ја враќаат чекор назад нека го задолжат претседателот на Собранието да го примени Деловникот, исто онака како што тоа го направи за кредитот од Унгарија и согласно член 126 став 3 нека ја закаже седницата на Комисијата. Во спротивно изјавите на првиот вицепремиер (Изет) Меџити дека ставот на владината коалиција дека овој закон нема да се донесе ќе биде потврда дека ДПМНЕ во Собранието се само бројка и дека немаат политички капацитет да ги исполнат своите ветувања. Колеги од власта ви изгореа сите лаги. Лицемерието и немањето капацитет да обезбедите услови овој закон да биде донесен излегоа на виделина“,
изјави Петровска.
Изјавите и коментарите од партиите на власт дадени изминатите десетина дена во врска со Предлог- измените на Законот за посебните права на припадниците на безбедносните сили и членовите на нивните семејства, по скратена постапка, според Петровска се пораз за демократијата и демант на сите нивни изјави во кои велат дека се свесни за значењето на соживотот и меѓуетничките односи. Но, и, како што додаде пратеничката најголем доказ дека некои политичари не ја сфатиле суштината на интеграцијата во Европската Унија и својата улога во нашето општество.
Пратеничката на СДСМ и ексминистерка за одбрана рече дека измените на Законот не се ниту провокација, ниту обид за дестабилизација, туку одговор на барањето за правда и правичност.
„Тоа се мотивите заради кои е поднесен. И овој закон не се однесува само на припадниците на безбедносните сили кои учествувале во воениот конфликт во 2001 година, туку и на оние кои загинале извршувајќи ги задачите во интерес и заштита на сите граѓани на Република Северна Македонија“,
изјави Петровска.
Говорејќи за предлог законското решение, таа соопшти дека сличен закон кој лани во ноември бил поднесен во Собранието на иницијатива на партијата Достоинство на Стојанче Ангелов бил подготвен во нејзиниот кабинет како тогашна министерка за одбрана.
„Затоа што јавноста има право да ја знае вистината, ќе соопштам дека всушност Предлог-законот кој тогаш беше поднесен како иницијатива од Достоинство беше подготвен во мојот кабинет како министерка за одбрана во координација со Стојанче Ангелов. Но заради неговата одлука да направи предизборна коалиција со ВМРО-ДПМНЕ тој Предлог-законот го поднесе како сопствена иницијатива, а не како предлог на Владата. Но, и тој Предлог-закон СДСМ тогаш го поддржа“,
изјави пратеничката на СДСМ.
Дообјаснувајќи го овој момент, Петровска кажа дека биле подготвени две верзии на предлог-измените на законот.
„Едниот беше тој што беше поднесен и овој што сега се поднесува. Овој закон којшто сега е предложен, е предложен во јули месец и тука исто така треба власта да одговори зошто дозволила неколку месеци претседателот на Собранието да го чува законот, да не го доставува и да не закажува седница иако согласно Деловникот мора тоа да го направи. Но, нејсе, зборуваме за два предлог-закони, едниот е овој што јас го поднесов, другиот беше тој што беше поднесен во ноември или декември 2023 година. Овој е со поширок обем“,
изјави Петровска.