„Денес имаме шанса да ги зајакнеме мултилатералната агенда и глобалните системи, приспособувајќи ги на предизвиците со кои се соочуваме во областа на меѓународниот мир и безбедност. Утре веќе е наша сегашност“, рече шефот на дипломатијата
Светот се соочува со многу закани и нови конфликти, како тероризам, насилен екстремизам, ризици од нови технологии, кршење на човековите права и климатски промени. Но, ниту една земја не може сама да се справи со овие предизвици. Затоа е потребен мултилатерализам за обезбедување меѓународен мир и безбедност. Ова го рече министерот за надворешни работи и надворешна трговија Тимчо Муцунски во своето обраќање на Самитот на иднината на тема „Зајакнување на мултилатерализмот за меѓународниот мир и безбедност“ на маргините на 79. Генерално собрание на Обединетите нации во Њујорк.
„Самитот на иднината претставува можност за зајакнување на глобалното владеење и одговор на актуелните и идните предизвици. Пактот ни нуди траекторија за глобални акции и отвора пат за засилување на мултилатерализмот“,
вели тој.
Во обраќањето министерот изрази подготвеност за активно учество во напорите за зајакнување на мултилатерализмот, како и дека злото од воени и конфликти мора да остане во минатото, а иднината да биде предвидлива, просперитетна и без страв.
„Денес имаме шанса да ги зајакнеме мултилатералната агенда и глобалните системи приспособувајќи ги на предизвиците со кои се соочуваме во областа на меѓународниот мир и безбедност. Утре веќе е наша сегашност“,
рече министерот во обраќањето.
Ја посочи и потребата за промовирање на мултилатерални решенија засновани на Повелбата на ОН, како и за почитувањето на човековите права, владеењето на правото и демократијата, како клучни дипломатски алатки.
Инаку, на маргините на Генералното собрание на Обединетите нации во Њујорк за денеска е предвидена билатерална средба меѓу шефовите на дипломатиите на Грција на Северна Македонија, односно меѓу Јоргос Герапетритис и Тимчо Муцунски. Оваа информација вчеравечер ја потврди и Министерство за надворешни работи и надворешна трговија.
Ова ќе биде прва средба меѓу министрите на двете држави.