Работам со студентите, најголем дел завршиле со студиите но и понатаму ме консултираат за филмовите што денеска ги подготвуваат, кажа Грбевски на кој му беше доделена наградата „Голема ѕвезда на македонскиот филм“
Годинашниот добитник на наградата „Голема ѕвезда на македонскиот филм“, македонскиот филмски и телевизиски монтажер Димитар Грбевски, вели дека за него претставува големо признание за трудот што го вложил во создавањето филмови и што станал дел од македонската кинематографија. Тој на денешната прес-конференција во рамки на фестивалот „Браќа Манаки“ кажа дека се уште е активен и работи со студентите кои го консултираат за филмови.
„Работам со студентите, најголем дел завршиле со студиите но и понатаму ме консултираат за филмовите што денеска ги подготвуваат. Многу генерации завршија филмска монтажа, дел од нив се надвор од Македонија, но постојано комуницираме“,
кажа Грбевски.
Димитар Грбевски учествувал во повеќе од 30 филмови, во 1981 година ја освои Повелбата за долгогодишен придонес на Фестивалот на југословенски документарен и краток филм во Белград, а добитник е и на наградата „Златен објекти“ што ја доделува Кинотека на Македонија.
На прес-конференцијата денеска се обратија и другите наградени – Бруно Делбонел годинашниот лауреат на „Златна камера 300“ за животен опус и Дариа Д’Антонио, кинематограферката на „Партенопе” во режија на Паоло Сорентино – филм со кој синоќа се отвори Фестивалот.
На средбата со новинарите зборуваа и претставниците на жирито на „Браќа Манаки“ кои порачаа дека долг и тежок е процесот да се одлучи кој филм е најдобар. Според австралискиот кинематографер и оскаровец Џон Сил, фестивалот во Битола е фестивал на кој сите се победници.
„Прв пат во Битола бев во 2016 година. Благодарам за приликата да работам на овој фестивал, фестивал на кој сите се победници. Многу е тешко да одлучиш кој филм е подобар од другите бидејќи пристапот во работењето е различен. Среќа е што сум претседател на жирито затоа што другите четири членови ќе одлучат и за мене, а јас ќе потврдам. Долг и тежок е процесот да се одлучи кој филм ќе биде најдобар, “
вели Сил.
Во петчленото меѓународно жири, претставник од Северна Македонија е Владимир Блажевски, режисер и сценарист.
„Нашата работа е да го видиме ремек делото во секој филм. Се е специфично и затоа нашата работа на овој фестивал е со многу предизвици. Пред 15 години прв пат бев член на жирито и тоа е мое мало искуство. Да си член на жири е убава работа, но и „темен“ момент бидејќи треба да се пресуди,“
вели Блажевски.
Официјалното отворање на 45. издание на „Браќа Манаки“ се случи вчера. Фестивалот го отвори претседателката Гордана Сиљановска Давкова со видео обраќање. Во говорот таа порача дека со право овој важен и чудесен настан ги слави и величи кинематограферите како волшебници и магионичари кои од приказната прават слика и филм.
На големата сцена во Битола беше доделена наградата „Златна Камера 300“ за животно дело, која му припадна на францускиот кинематографер Бруно Далбонел, а ја врачи претседателот на владата Христијан Мицкоски. Лауреатот Далбонел истакна дека би сакал „да му врати на киното за тоа што киното го направило за него“.
Специјалната награда „Златна камера 300“ за особен придонес во светската филмска уметност ја додели градоначалникот на Битола Тони Коњановски на истакнатата полска кинематограферка Јоланта Дилевска.
На годинашното издание на фестивалот најавено е присуство на 300 до 450 гости, меѓу кои претседатели и претставници на бројни национални и меѓународни кинематограферски организации (од САД, ОК, Италија, Франција, Шпанија, Австралија, ИМАГО), реномирани светски познати кинематографери.