Во соопштението од коалицијата „Вреди“ по грешка е оставена реченицата „преведете го на албански“, што според ДУИ е загрижувачки и открива дека овие соопштенија се напишани од нивните македонски патрони – ВМРО-ДПМНЕ, а потоа им се предадени на нив
Неколку албански политички субјекти, кои влегоа во владата преку поддршката од македонските партии, издадоа неосновано соопштение против ДУИ и нашиот лидер, Али Ахмети, велат од опозициската партија. Во интегралното соопштение од коалицијата „Вреди“ испратено до медиумите, по грешка е оставена реченицата „преведете го на албански“, што според ДУИ е загрижувачки и открива дека овие соопштенија се напишани од нивните македонски патрони – ВМРО-ДПМНЕ, а потоа им се предадени на нив.
„Овој факт јасно покажува дека овие субјекти не ги претставуваат интересите на албанската заедница, туку се алатки во служба на туѓи интереси. Со овој срамен чин, тие јасно покажаа дека немаат политичка независност и дека се користат за да ги нападнат интересите на Албанците и да го оцрнат угледот на ОНА и ДУИ“,
се наведува во соопштението од ДУИ.
Од ДУИ велат дека го осудуваат овој политички манипулациски чин и ги повикуваат Албанците да не ја толерираат оваа, како што велат, отворена предавничка постапка.
„Албанскиот народ заслужува достојно и искрено претставување, а не политички актери кои следат туѓи сценарија. ДУИ и Али Ахмети ќе продолжат да ги бранат интересите на Албанците, со транспарентност и достоинство, како и секогаш. Ние остануваме цврсто посветени на нашата агенда за напредок на Албанците во оваа земја“,
велат од ДУИ.
Претходно од коалицијата „Вреди“ испратија соопштение во кое велат дека замрзувањето на балансерот нема да го загрози правото на вработување на ниту еден Албанец, ниту на припадниците на други етнички заедници. Во соопштението се наведува и дека „лагите на Ахмети не поминуваат ниту кај пратениците од „Европскиот фронт“.