„На патување во САД, во Њујорк, дон Николовски изнајмил хотел каде од вечер платил 500 евра, а во Чикаго 450 евра. Во Рим платил 300 евра за хотелско сместување, а во Виена за две вечери 670 евра. Живеел на висока нога со народни пари“, рече пратеникот Петрушевски
Од владејачката ВМРО-ДПМНЕ денеска излегоа со обвинувања насочени кон ексминистерот за земјоделство, шумарство и водостопанство Љупчо Николовски, велејќи дека додека бил на чело на институцијата плаќал по 500 евра за ноќевање во хотели низ Европа и САД.
Претходните неколку дена од партијата на власт посочија дека за три и пол години додека бил министер потрошил 976 199 денари во кафеани и ресторани.
„Наместо Љупчо дон Николовски да најде начин како да исплати над 50 милиони евра заостанати субвенции на земјоделците, тој со народни пари плаќал 500 евра за една вечер во хотели низ Европа и САД“,
рече пратеникот Бране Петрушевски, од партиското седиште на ВМРО-ДПМНЕ.
Според него, на ниту едно патување Николовски не избрал економичен хотел, а како што вели, за картите на патувањата се плаќани и по неколку стотина евра.
„На патување во САД, во Њујорк, дон Николовски изнајмил хотел каде од вечер платил 500 евра, а во Чикаго 450 евра. Во Рим платил 300 евра за хотелско сместување, а во Виена за две вечери 670 евра. Живеел на висока нога со народни пари“,
вели Петрушовски.
Од сознанија што ги има, Петрушовски вели дека се доаѓа до заклучок оти Николовски поголем дел од времето го поминувал на патувања и репрезентации по кафеани, отколку да биде на терен и да ги решава проблемите на земјоделците.
„Дон Николовски за времето додека бил министер потрошил 16 илјадие вра за кафеани и ресторани, а во исто време земјоделските производи на нашите земјоделци скапувале на нивите зашто немало пласман“,
рече пратеникот од ВМРО-ДПМНЕ.
Од владејачката партија веќе неколку дена излегуваат со обвинувања кон ексминистерот Николовски. Пред две недели актуелниот министер за земјоделство, шумарство и водостопанство Цветан Трипуновски на прес-конференција рече дека Николовски додека бил на чело на ова министерство овозможил две фирми незаконски да добијат државни субвенции од илјадници евра.
Ваквите тврдења од Трипуновски, Николовски ги нарече празни обвинувања кон него во обид да се направи театар пред јавноста.