Европратеникот оценува дека ВМРО-ДПМНЕ на секој начин покажува дека сака да се приклучи кон Фидес, партијата на унгарскиот премиер Виктор Орбан бидејќи, како што вели, се оддалечува од вредностите на ЕПП
Бугарскиот европратеник од редовите на ГЕРБ, Андреј Ковачев, дел од Европската народна партија (ЕПП), бара партијата да ја исклучи ВМРО-ДПМНЕ, која е дел од ова „семејство“ на партии од десниот центар во Европа.
„Европската народна партија е информирана за политиката на ВМРО-ДПМНЕ кон Бугарија. Постојат опции за замрзнување на членството и отстранување на партијата од групата“,
изјави бугарскиот европратеник Андреј Ковачев за тамошните медиуми.
Оценува дека ВМРО-ДПМНЕ на секој начин покажува дека сака да се приклучи кон Фидес, партијата на унгарскиот премиер Виктор Орбан бидејќи, како што вели, се оддалечува од вредностите на ЕПП.
Вели дека низата провокации од македонска страна во никој случај не се предизвикани од Бугарија, но и дека Бугарија не ги користи овие теми за предизборната кампања, како што обвинуваат македонските политичари.
„Се обидуваат да не испровоцираат за да може ние да бидеме виновниците, а тие да одат каде што отидоа со Вучиќ и Орбан во Кина и Русија. Ова е геополитичкиот наратив“,
рече Ковачев и додаде:
„Ние се однесуваме крајно цивилизирано и европски. Многупати сме подале рака, но очигледно актуелното раководство на Северна Македонија не сака да продолжи по патот на европската интеграција. Бараат изговор кај домашната јавност зошто тоа не може да се случи, а изговорот е, се разбира, со клеветење на Бугарија.“
Прашан дали Бугарија треба да ја зајакне својата политика кон С Македонија, европратеникот кажа дека мора да го почитуваат европскиот дух и да очекуваат земјите кандидати да ги исполнат своите обврски. Не останува ништо друго, додаде Ковачев, освен Софија да инсистира на нивно спроведување и да побара од своите партнери, меѓу кои и од САД, тоа повеќепати да го повторуваат пред Скопје.