„Мислам дека не ни требаат вакви тензични состојби во овој период. Некако се избрза. Некој можеби сакаше да се зборува за ова и да се дефокусира од другите поважни теми“, изјави министерот за здравство коментирајќи ја одлуката на Уставен за „балансерот“
Министерот за здравство Арбен Таравари, кој е дел од владејачката коалиција „Вреди“, ја оцени за избрзана одлуката на Уставниот суд кој поведе постапка за „балансерот“ и додаде дека во овој период не ни се потребни вакви, како што рече, тензични состојби.
Додаде дека со коалициските партнери од ВМРО-ДПМНЕ имале договор прво да го договорат законот за правична застапеност на сите заедници, а потоа да се решава прашањето за „балансерот“.
„Мислам дека одлуката е избрзана, меѓутоа тоа е одлука на Уставниот суд. Иницијативата, колку што знам, е од партијата Левица. Во Уставниот суд, за жал, се судии коишто се избрани и иако судиите треба да бидат неутрални. Меѓутоа, мислам дека не ни требаат вакви тензични состојби во овој период. Некако се избрза. Некој можеби сакаше да се зборува за ова и да се дефокусира од другите поважни теми“,
изјави Таравари.
Додаде дека „балансерот“ бил добра алатка, но оти почнал да се злоупотребува во последно време.
„Во албанските општини се пишуваа како Македонци за Албанци да се вработат, а генерално во државната централна администрација повеќе Македонци се пишуваа како Роми, Турци, Албанци за да бидат примени на работа. ‘Балансерот’ веќе беше алатка којашто се злоупотребуваше наголемо, така што мораме да изнајдеме решение за да сите категории на луѓе бидат застапени во државната администрација“,
додаде министерот за здравство.
Новиот закон за правична застапеност, како што кажа, прво мора да се синхронизира со коалициските партнери, па потоа да биде доставен во Собранието.