Израелскиот државјанин, „бизнисмен кој долго време живеел во Турција“, според соопштението, одржувал врски со Турци и Иранци кои телефонски го поврзувале со „богат бизнисмен во Иран наречен Еди“
Израелски државјанин е уапсен под сомнение дека бил регрутиран од Иран да подготвува атентати на израелски функционери, вклучително и на премиерот Бенјамин Нетанјаху, соопштија денеска полицијата и службата за внатрешна безбедност Шин Бет.
„Граѓанинот на Израел бил регрутиран од иранската разузнавачка служба да подготвува атентати на израелски личности. Тој два пати бил тајно во Иран и бил платен за извршување на тие мисии“,
се вели во заедничкото соопштение на полицијата и Шин Бет.
Според нив, цел на атентатите биле премиерот Нетанјаху, министерот за одбрана Јоав Галан и други високи функционери.
Израелскиот државјанин, „бизнисмен кој долго време живеел во Турција“, според соопштението, одржувал врски со Турци и Иранци кои телефонски го поврзувале со „богат бизнисмен во Иран наречен Еди“.
Евреинот, по потекло од јужниот град Ашкелон, според израелските медиуми, тајно влегол во Иран во мај 2024 година за да се сретне лице в лице со „Еди“, кому наводно му било тешко да го напушти Иран.
За време на тој разговор, Израелецот се сретнал со извесен „Хада“ кој бил претставен како агент на иранската безбедносна служба.
Тогаш на Израелецот му било предложено да изврши акции во корист на Иран во Израел, односно да „префрли пари или оружје“, да фотографира различни места со многу луѓе и да соработува со израелски граѓани со кои Иран веќе имал договор да се придржуваат до упатствата, се вели во соопштението.
За време на неговата втора посета на Иран, во август, му било предложено да изврши атентат врз официјални лица во Израел за да се одмазди за атентатот на 31 јули во Техеран на поранешниот шеф на исламистичкото движење Хамас, Исмаил Ханије.
Иран убиството на Ханије го припиша на Израел, кој сè уште не ги коментирал обвинувањата.