„Важно е да се види каква ќе биде реакцијата на премиерот на Република Северна Македонија, Христијан Мицкоски. За вакви навредливи квалификации во една европска држава веднаш ‘паѓа главата’ на министерот. Моментално и на лице место летаат оставки“, рече поранешниот бугарски министер за надворешни работи Даниел Митов
Ова е уште една провокација од властите во Република Северна Македонија насочена кон уништување на добрососедските односи и на она што досега е постигнато. Ова е денешниот коментар од поранешниот бугарски министер за надворешни работи и пратеник од партијата ГЕРБ, Даниел Митов, за изјавата на вицепремиерот и министер за транспорт Александар Николоски упатена кон бугарските власти во врска со непоставувањето на македонското знаме на средбата на претседателката Гордана Сиљановска-Давкова со бугарскиот претседател Румен Радев. ГЕРБ на Бојко Борисов е најголема политичка партија во Бугарија.
„Важно е да се види каква ќе биде реакцијата на премиерот на Република Северна Македонија, Христијан Мицкоски. За вакви навредливи квалификации во една европска држава веднаш ‘паѓа‘ главата на министерот. Моментално и на лице место летаат оставки“,
рече тој.
Според него, еден владин министер во европска земја нема право да користи такви зборови, не само во однос на соседот, туку и кон која било друга европска земја или европски народ.
„Очигледно ова е уште една провокација на властите во РСМ насочена кон уништување на добрососедските односи и на она што досега е постигнато. Бугарските власти на ова треба да одговорат максимално цврсто, но во исто време и без емоции“,
вели тој.
Посочи дека кога ќе се види реакцијата на властите во Скопје, тогаш ќе може да се дадат дополнителни коментари кои би можеле да се засноваат на проценка, како што вели, за она што направиле или она што не направиле.
Вицепремеиерот и министер за транспорт Александар Николоски вчера во гостување на ТВ Алфа, зборувајќи за отсуството на македонското знаме на заедничката фотографија на Сиљановска-Давкова и Радев, меѓу другото, рече:
„Очигледно домаќинот не е цивилизиран и не е пристоен. Слободно нека пратат за ова протестна нота. Помизерни од нив се само нашиве домашни слуги, што потпишаа дека македонскиот и бугарскиот народ имаат заедничка историја, а немаат, истите што потпишаа дека македонскиот јазик е дијалектна форма на бугарскиот јазик и што потпишаа дека никогаш нема да влеземе во Европската Унија ако не прифатиме дека сме Бугари и имаме бугарски корени, сега зборуваат за патриотизам. Тоа не е само мизерно, туку е дно“.
Ако пропуштивте, вчера имаше пердашење цобиња на телевизија 😂@AlexandarMKD мава ко на поган.
— 𝕸𝖆𝖈𝖍𝖊 𝕏 (@Vlatko100janosk) September 18, 2024
Цело, тука:
👉 https://t.co/dyFBuTtPl1 pic.twitter.com/8ryBADJG0A
Бугарското Министерство за надворешни работи денеска соопшти дека ги известиле партнерите за „неиспровоцираните провокации” од функционери на Северна Македонија, чија цел, според официјална Софија, е да се наруши дијалогот.
Во официјалното соопштение на бугарското МНР се вели дека се неприфатливи последователните навредливи квалификации кон Бугарија и бугарскиот народ од функционери на Република Северна Македонија и дека категорично одбиваат да се вклучат во таков неевропски тон, неспоив со доброто воспитување.
Претседателката Сиљановска-Давкова во понеделникот во ТВ-настап рече дека доколку си заминела кога забележала дека го нема македонското државно знаме, ќе предизвикала скандал и одлучила да не го направи тоа.