Предметниот обвинител му предложил на Судот за обвинетите да определи мерки на претпазливост, како и да се спроведе единствена постапка и поднесениот обвинителен предлог да биде споен во веќе оформениот предмет „Синџир“
Врз основа на дополнително обезбеден доказен материјал, предметниот обвинител од Основното јавно обвинителство за гонење на организиран криминал и корупција (ОЈО-ГОКК) надлежен за случајот „Синџир“, до Основниот кривичен суд Скопје денеска поднел Обвинителен предлог против петнаесет лица вработени во Генералниот даночен инспекторат на УЈП и регионалните дирекции на УЈП во Скопје, Битола и Прилеп, информираат од Обвинителството. Оттаму додаваат дека сите обвинети се осомничени дека сториле продолжено кривично дело – злоупотреба на службената положба и овластување.
Станува збор за службени лица во Управата за јавни приходи кои во посочениот период биле главни генерални инспектори или вршители на должност, нивни заменици, управници на регионалните дирекции, началници на даночни инспекторати и раководители на одделенијата за регистрација и утврдување даноци во регионалните дирекции, членови на телата за одобрување на ДДВ побарувања со барање за враќање при регионалните дирекции, самостоен даночен советник за анализа на ризик и планирање на контроли и инспектор за даночни обврзници.
„Обвинетите во периодот од 01.01.2019 до 31.12.2021 година како службени лица во УЈП, искористувајќи ист траен однос и исти прилики, не ја извршиле својата службена положба и овластување со намера да прибават за друг значителна имотна корист или на друг да му нанесат значителна имотна штета. Така, во зависност од нивните службени овластувања, не ја организирале и координирале работата на Генералниот даночен инспекторат со функциите на Регионалните даночни инспекторати во Скопје, Прилеп и Битола, за дел од даночните обврзници не извршиле соодветно рангирање според степенот на ризичност и самостојно не издале налози за контроли, не изготвиле предлог листи на даночни обврзници за вршење надворешна контрола, иако дел од обврзниците според степенот на ризик припаѓале во ризични даночни обврзници каде задолжително било потребно да се извршуваат надворешни контроли. Така, за дел од кривичноодговорните правни лица опфатени во предметот „Синџир“ кои како даночни обврзници поднесувале задолжителни даночни пријави и годишни завршни сметки во Регионалните дирекции Прилеп, Битола и Скопје, по основ на непресметан и неплатен данок прибавиле значителна имотна корист во износ од 167 918 419 денари предизвикувајќи штета на УЈП во вкупен износ од 206 456 437 денари“,
соопштија од Обвинителството.
Предметниот обвинител му предложил на Судот за обвинетите да определи мерки на претпазливост, како и да се спроведе единствена постапка и поднесениот обвинителен предлог да биде споен во веќе оформениот предмет „Синџир“.
На почетокот на јули шестмина обвинети за финансиски криминал во случајот „Синџир“, кои ја признаа вината, од кои тројца се осудени за злосторничко здружување и даночно затајување, а двајца за перење пари, добија пет затворски и една условна казна. Судот ги задолжи да го вратат даночниот долг, но веројатно наплатата ќе се спроведува тешко, со оглед на тоа дека фирмите со кои ги правеле злоупотребите немаат пари на сметка, а обвинетите немаат имот на нивно име.
Инаку, во случајот „Синџир“, кој беше отворен кон крајот на октомври лани, со истрагата беа опфатени 26 лица, сопственици и управители на 28 фирми, осомничени дека создале шема за даночно затајување, преку која со издавање на фактури со ДДВ за наводно извршени набавки, кои не постоеле, го оштетиле државниот буџет за околу осум милиони евра.
Во меѓувреме истрагата беше проширена за уште две лица, а за едно лице, кое во меѓувреме додека траеше постапката за оценка на обвинителниот акт почина, донесено е решение за запирање на истрагата. Судењето продолжи за 11 обвинети кои не признаа вина.