Обвинителите изјавија дека Доминик Пелико нудел секс со својата сопруга на веб-страницата и ги снимал силувањата. Покрај него, им се суди уште на 50 други кои се обвинети за силување
Доминик Пелико, Французинот обвинет дека ја дрогирал сопругата и регрутирал десетици странци за да ја силуваат во текот на една деценија, денеска ги призна кривичните дела со кои се соочува и го молеше семејството за прошка, пренесоа француските медиуми.
Доминик Пелико требаше да сведочи минатата недела за случајот што ја шокира Франција, но неговото доаѓање беше одложено поради здравствени проблеми. На суд се појави со бастун.
„Ги признавам обвиненијата во целост. Јас сум силувач како и сите други во оваа соба (…) Ги молам мојата сопруга, децата, внуците да ги прифатат моите извинувања. Се каам за она што го направив. Барам прошка, дури и ако е непростливо“,
изјави 71-годишниот Доминик Пелико, пренесе ТВ БФМ, чиј репортер бил присутен во судницата.
Пелико се соочува со обвиненија кои вклучуваат силување, групно силување и разни прекршувања на приватноста преку фотографирање и споделување сексуални фотографии.
Тој во судницата рече дека имал тешко детство и дека и самиот бил жртва на силување. На моменти дури и плачеше, пишуваат француските медиуми.
Во судницата била неговата поранешна сопруга, 72-годишната Жизел Пелико.
Обвинителите изјавија дека Доминик Пелико нудел секс со својата сопруга на веб-страницата и ги снимал силувањата. Покрај него, им се суди уште на 50 други кои се обвинети за силување.
Обвинетиот може да добие затворска казна до 20 години
Некои обвинети рекоа дека верувале оти Жизел Пелико се преправала дека спие кога всушност се согласила на секс.
Доколку бидат прогласени за виновни, им се заканува затворска казна до 20 години.
Жизел Пелико инсистираше судењето да биде јавно со цел да се разоткријат тој и другите мажи обвинети за силување и расветлување на сексуалното насилство, рекоа нејзините адвокати.
За многумина таа стана симбол на борбата против сексуалното насилство во Франција. Стотици луѓе, главно жени, се собраа во градовите низ земјата во саботата за да ја покажат својата поддршка.